حوار مع صديقي العروبي
النقاش مع العروبين يسير دائماً بنفس الاتجاه وغالباً لنفس النتيجة
صديقي العروبي رغم أنو ما بيشبه العرب لا شكلاً ولا ثقافةً، بس هو مقتنع تماماً أنو هو عربي، أحياناً بقلي لأنو هو بيحكي عربي وأحياناً لأنو هو مسلم مع العلم أنو صديقي بيعرف أنو في مسلمين مو عرب وبيعرف في ناس بتحكي فرنسي مثلا بدون ما تكون منتمية للقومية الفرنسية، ببساطة أي شخص ممكن يكون مسلم بدون ما يكون عربي وممكن يحكي عربي بدون ما يكون عربي، وملخص كل حواراتنا بتكون على شاكلة الحوار التالي:
ضمن سياق الحديث لما اذكر أننا سوريين مو عرب، بنط صاحبي اللي استفزتو هي الكلمة ليبلش النقاش
صاحبي: كيف زبطت معك ؟ كيف يعني مو عربي ؟
صاحبي: كيف زبطت معك ؟ كيف يعني مو عربي ؟
أنا: الشعب السوري أغلبيتو من أصول محلية يعني برجع أصلهن للآراميين والكنعانيين والأموريين وبالتالي السوريين مو عرب وأنا سوري مو عربي.
صاحبي: لا مو صح هاد الكلام، لأنو هي الشعوب اللي ذكرتها انقرضت ونحن عرب وألنا الفخر بهاد الشي.
أنا: بس الدراسات الجينية بتثبت هاد الشي وأنو أغلب السوريين من أصول محلية!
صاحبي: أي بس انا قرأت أنو أصل هدول الشعوب هو من شبه الجزيرة العربية، وهنن مهاجرين من اليمن والحجاز لبلاد الشام، وبالتالي حتى لو نحن منهن فنحن عرب.
أنا: بس هي النظرية طلعت باطلة وما لها أي مصدر أكاديمي حديث، ومنهاج صف الخامس مو مصدر علمي.
صاحبي: ليش عبتحكي عربي معناها إذا أنت مو عربي؟ روح احكي فينيقي أو سرياني (مع ابتسامة ساخرة).
أنا: أولا أنا عبحكي سوري مو عربي وعلى فرض أنو عبحكي عربي في كتير شعوب بتحكي بلغات مو لغاتها فالسنغالي بيحكي فرنسي والأرجنتيني بيحكي اسباني والجنوب أفريقي بيحكي أنكليزي.
صاحبي: أصلا ما في أي عرق صافي وكلنا عبارة عن خليط من الشعوب.
أنا: صحيح وهاد الشي بنطبق على كل الشعوب بما فيها العرب والأفارقة والصينيين، بس هاد ما قدر يلغي أصلهن وصفاتهن اللي بتميزهن عن بعض.
صاحبي: طيب ماشي بشو بفيدك هاد الكلام ان كنت عربي أو سوري، ولوين بدم تصل؟
أنا: أنا بحب أعرف مين أنا، وعندي رغبة أني أعرف تاريخ أرضي وأجدادي وهاد الشي مهم بالنسبة الي والحفاظ على الهوية السورية بشوفو واجب علي وواجب كل السوريين.
صاحبي: أساساً أنت واحد حاقد على العرب والمسلمين .. أنت واحد عنصري مقرف!!
صاحبي استفزو كلامي لأنو متعرض لغسيل دماغ بمدارس البعث والعقل الباطني صعب يتقبل أنو كل شي تعلمو كذب بسهولة.
والملفت بهيك حوارات أنو رغم أنو العروبي بقول نحن عرب ومنفتخر، بس بعد ثواني بتهمك بالعنصرية وبقول ما في شعب صافي لما تقول عن حالك أنك سوري وبس، وفجأة بصير معادي للقوميات وما بهمو أن كان عربي أو سوري!
كتلة تناقضات ناجمة عن جهل ثقافي كبير للأسف بتشكل هي الشريحة نسبة كبيرة من السوريين اليوم المتنكرين لأصولهن ولتاريخهن وهويتهن.
كل من ذكرتهم عن عرب .
ردحذفجميع الحضارات التي ذكرتها عربية بمن فيهم الفينيقيين .
ردحذف