مملكة يمحاض أقوى مملكة سورية في عصرها
يمحاض واحدة من الممالك السورية التي أسسها العموريون
تأسست مملكة يمحاض بشمال غرب سوريا، وامتددت لتشمل معظم الشمال السوري وكان مركزها مدينة حلب اليوم، وهاد الشي قبل قرابة 4000 سنة.
بشكل الأموريين (العموريين) أغلب سكانها لهيك فثقافة يمحاض ثقافة سورية كانت وكان ملكها واحد منهن، بس كمان كان بيسكنها الحوريين بنسبة منيحة، واللي بمتلكو ثقافة مختلفة أثرت شوي بمملكة يمحاض.
موقعها الاستراتيجي اكسبها أهمية كبيرة، فكانت ممر للقوافل اللي بتصل بلاد الرافدين بالبحر، والقوافل اللي متجهة لقبرص.
التسمية مرجح أنها لاسم قبيلة سورية أمورية، واستخدم اسم يمحاض بهداك الوقت للاشارة لمكز المملكة حلب،
كانت حلب مركز مملكة يمحاض مركز ديني مهم لعبادة آله العاصفة بعل حدد واللي انتشرت عبادتو بكل أنحاء سوريا الطبيعية، وتعتبر المدينة المقدسة لأنها بتضم معبد الإله حدد ، واللي ساهم كمان بازدهار يمحاض تراجع دور مملكة سورية تانية هي إيبلا بعد ما هاجمها الأكاديين بقيادة نارام سين.
كان سامو إيبوه هو الملك اليمحاضي الأول واللي ساهم بتأسيس وتوسيع المملكة وواجه يهدون ليم ملك ماري.
قوة يمحاض ومركزها خلاها تكون على صراعات دائمة مع الممالك المجاورة الطامعين فيها
من خلال وثائق مدينة ماري تبين أنو كان في نزاع كبير بين أكبر حاكمين بالمنطقة "يريم ليم" ملك يمحاض و"شمشي أدد" الآشوري، وهاد النزاع خلى باقي الممالك يكون الها موقف واضح فكانت مملكة إشوانا وملكها "إيبال بيئيل التاني" وبابل وملكها "حمورابي" بيدعمو مملكة يمحاض أما مملكة قطنا كانت بتدعم "شمشي أدد".
للمفارقة شمشي أدد من أصول سورية عمورية كمان وما كان آشوري.
نهب الحثيين الكتير من كنوز المدينة، وأخدو معهن تماثيل الإله حدد، حتى يتم تعظيمها وعبادتها بالأناضول وتمنحهن قوة يمحاض، بس كان اغتيال مورسيلي على طريق الرجعة سبب بكركبة كبيرة عند الحثيين وهاد خلى يمحاض ما تكون تابعة الهن رغم نهايتها بعد ما استمرت قرنين من الزمن.
كل المعلومات اللي قدر العلماء يجمعوها عن ممكلة يمحاض بترجع للآلواح المكتشفة بمناطق تانية بسوريا والعراق وخاصة ألواح ماري كون مدينة حلب اليوم موجودة على أنقاض مركز مملكة يمحاض القديمة وصعب يتم التنقيب فيها، ولو شي يوم قدرنا ننقب بقلب حلب رح نقدر نكشف أسرار ومعلومات كتيرة عن مملكة يمحاض وحدة من أقوى الممالك الأمورية في التاريخ القديم.
ليست هناك تعليقات:
إرسال تعليق