حدد الإله الأهم عند السوريين القدماء
إله العاصفة والأمطار انتشرت عبادته في كامل سوريا الطبيعية والعراق والأناضول
بكتير من مناطق الشرق الأدنى القديم، وخاصة في بلاد ما بين النهرين العليا وسوريا والأناضول الحضارات اللي اعتمدت على الزراعة بشكل أساسي على الأمطار، كان آلهة العواصف من بين أبرز الآلهة في البانثيا المحلية وأحيانا تم اعتبارهن ملوك إلهيين بحكمو الآلهة ويمنحو الملك للحاكم البشري. (4)
أدد بالأكادية أو إيشكور في السومرية أو حدد بالأرامية واحد من أهم الالهة الهلال الخصيب وسوريا الطبيعية، وهو اله للعواصف والأمطار أو اله الطقس، وبتقول الأساطير أنو كان يتجول على عربتو الخاصة ويجلد الغيوم مشان تنزل مطر، وصوت الرعد هو صوت التور تبعو اللي كان يزمجر ويهز الدنيا.
حدد يعتبر أساس الميتولوجيا السورية وأهم أركانها، فاشتهرت عبادته في دمشق وكان معبد الاله حدد هو مكان الجامع الأموي الحالي واللي كان اسمو بيت رمون يعني بيت الرعّاد باللغة الأكادية وقبل ما يكون كاتدرائية مسيحية، أما معبده الأكبر والأشهر واللي كان محج من كل سوريا هو اللي موجود اليوم جوات قلعة حلب وتم اكتشافه بالتسعينات من القرن الماضي وموجود على أعلى هضبة القلعة. (مقال عن معبد حدد في قلعة حلب)
كان لحدد أهمية كبيرة كتير في منطقة الساحل السوري عند الفينيقيين وخصوصي في ميثولوجيا أوغاريت باللاذقية وباقي مناطق انتشار الفينيقيين في أرواد وجبل لبنان وصولا لصيدا وصور.
كانت عبادة اله العواصف والأمطار شائعة حتى بمناطق الأناضول شمال سوريا وكان اله العواصف الاله الرئيسي عند الحوريين والحثيين بتأثير من حضارة بلاد الرافدين وسوريا.
بحتوي متحف غازي عنتاب جنوب تركيا على عدة تماثيل لحدد التقت بمنطقة الأناضول وجنوب تركيا على الحدود السورية.
أقدم ذكر موثق لحدد كان قبل 4500 سنة في نصوص فارا / شوروباك السومرية، وحسب الأساطير السورية القديمة وبرواية من الروايات الكتيرة بعل حدد هو ابن الاله دجن وهاد بكون اله الحبوب والغذاء ولهلأ كلمة دجن مستخدمة للدلالة على الأكل باللغة السورية المحكية متل ما كلمة بعل مستخدمة بالزراعة المعتمدة على المطر.
تأثير بعل حدد (بعل هو لقب لحدد) تأثير كبير على الفكر الديني القديم عند السوريين، وهو أساس لكتير من الأساطير السورية القديمة وركن من أركان المثيولوجيا السورية واللي كانت مرتبطة لحد كبير بحضارة بلاد الرافدين.
تمثال حدد في متحف اللوفر بباريس
اله حدد هو أكتر آله انعملو تماثيل في سوريا الطبيعية وواحد من أهم تماثيله اليوم موجود بمتحف اللوفر بباريس.
المصادر:
ليست هناك تعليقات:
إرسال تعليق