الاسم الآرامي لعاصمة سوريا
كان أول ذكر لها باسم داماسكي في وثائق إيبلا قبل 4000 عام
من أقدم الوثائق اللي انذكرت فيها دمشق عبر التاريخ كان رُقم مدينة إيبلا اللي بيرجع لعام 2000 قبل الميلاد وانورد ذكرها باسم داماسكي، وانذكرت المدينة أكتر من مرة بنصوص مصرية قديمة ومن أبرزها ألواح تحتمس التالت اللي بترجع للقرن 15 قبل الميلاد وانذكرت باسم تيمساك أما رسائل تل العمارنة انذكرت باسم تيماشكي.
وفي الفترات اللي تبعتها اتسمت المدينة باسماء كتيرة تتغير مع وصول امبراطورية جديدة أو مستعمر جديد فسماها الآشوريين دمشقا وأحيانا إيميري شو.
أما الآراميين اللي كانو سكان دمشق الأساسيين فسموها ديماشق، وورد اسم دارميساك أو دراميسيق ببعض النصوص الآرامية وبتعني الأسماء الآرامية الدار أو الأرض المسقية أو المكان اللي فيو مي كتير، والكلمة تحرف نطقها وصارت معروفة باللغة اللاتينية داماسكس.
دمشق بعد عصر رمسيس التالت عام 1166 قبل الميلاد استقلت تماماً عن التأثير المصري وبلشت ملامحها السورية الآرامية تكون ظاهرة وواضحة من سياسة وثقافة ولغة، وصارت المملكة الأقوى والأكتر نفوذ على الممالك المحيطة وجابهت الآشوريين وكانت بتحمل اسم دمشق - آرام بعام 853 قبل الميلاد، وكان ملكها حدد إيداري، وظهر اسم ملكها حزائيل بعد ما انتصر بمعركة جلعاد، وكانت فترة دهبية لدمشق بهداك الوقت، بس بعصر ملكها رصين أوريدل عام 732 قبل الميلاد رجعت تحت الاحتلال الآشوري.
العالم سوفاجيه قدر يحدد ابعاد آرام - دمشق ضمن السور، وقدر يرسم شوارعها والمعبد الآرامي (الجامع الأموي حالياً) والقصر الملكي بمنطقة السماكة، ولهلأ القرى المحيطة بدمشق بتحمل اسمها الآرامي القديم.
العرب حاولو يغيرو اسمها واستخدمو اسم الفيحاء بس بقي اسم دمشق هو الدارج والمستعمل حتى وقتنا الحالي.
ليست هناك تعليقات:
إرسال تعليق