تحوّلات التملق السياسي في سوريا
من "الشبح" إلى "التاهو" كيف يعيد المتملقون إنتاج أنفسهم اليوم
اليوم وبعد تغير السلطة، فجأة عم نرجع نشوف هي الظاهرة، فنفس الوجوه اللي أتقنت فن التلون بالسابق، عم ترجع تهندس شكلها ومفرداتها لتناسب المرحلة الجديدة، كمحاولة لحجز مقعد بالصفوف الأولى.
المأساة اليوم مو الزيادة المفاجأة بالمظاهر الدينية والاجتماعية الجديدة ولا بتبديل الشعارات العروبية لشعارات إسلامية، بس لازم نعرف إنو هاد المجتمع ما انولد إيمانو هاد بين ليلة وضحاها، وسردية إنو هي المظاهر طلعت من كبت نظام الأسد مو دقيق، وهي مجرد محاولة لكتابة سردية جديدة تبرر التحول المفاجئ هاد، وتتستر على النفاق المجتمعي.
جوهر أزمة التملق للسلطة هو إنو هي "الحرباية الاجتماعية" ما بتآمن بفكرة متل ما بتآمن بمصالحها الضيقة الشخصية وعلى حساب المصلحة العامة، والمنظومة الاجتماعية بسوريا خلال العقود السابقة رسخت الفكر الأناني والمصلحة الشخصية على المصلحة العامة، فجزء كبير من اللي كانوا يكتبوا تقارير ويضرّوا الناس أيام النظام السابق، مستعدين اليوم يلعبوا نفس الدور تماماً تملقاً للسلطة الجديدة، على أمل يحسنوا وضعن المعيشي أو يكسبوا مكانة اجتماعية جديدة.
مشان هيك، انتشار المظاهر الدينية بشكل مفاجئ اليوم ما بيعني أبداً إنو إيمان الناس زاد فجأة، بقدر ما هو دليل على حالة "التلوّن" وعمق ثقافة التملق بالمجتمع. فنفس الشخص اللي كان مبارح يردد شعارات "القائد الخالد" ويتصدر احتفالات "الحركة التصحيحية"، منشوفو اليوم أول واحد عم يحتفل بالتحرير ويرفع شعارات دينية، بس ليركب الموجة من أولها ويمسح ماضيه.
الشي المحزن فعلاً هو الجيل الجديد اللي عم يوعى بهيك أجواء؛ جيل ما بيعرف حقيقة ماضي أهلو وتلوناتهن، وعم يتعلم التملق كأنو شطارة، ويتربى على مبدأ "مصلحتي وبس" حتى لو كانت على حساب أذية المجتمع كلو.
وحتى رموز القوة والهيبة بالشارع بقيت نفسها بس أدواتها تغيرت، فمبارح كان اللي بيركب "مرسيدس شبح" سودا بيعطي طابع المسؤول المهم، شخص الكل بيحسبلو حساب وبيسمع كلمتو، خصوصاً إذا كان مع مرافق عم يناديه "سيدي" أو صورة للأسد أو شعار لحزب البعث على بلور السيارة. اليوم عم يتكرر نفس السيناريو تماماً بس بلون مختلف، "التاهو" بلشت تلعب دور "الشبح"، ولقب "سيدي" صار "شيخي"، وبدل صورة الأسد انحطت عبارة "لا إله إلا الله" أو شعارات دينية. بهالطريقة البسيطة، بيقدر الشخص يصنع لحالو هيبة مصطنعة ومكانة اجتماعية جديدة بتعطي رهبة لأي حدا بيفكر يتصادم معو.
التغيير الحقيقي ما بينقاس على سرعة المتملقين بتغيير جلدهن من شعارات ولبس وسيارات، وهي الدوامة ما رح تنكسر إلا لما نبني دولة قانون ومواطنة، تكون فيها الهيبة والمكانة للكفاءة والنزاهة مو للقرب من السلطة، والأهم نعرف كيف نحمي الجيل الجديد من عدوى الانتهازية اللي دمرت مجتمعنا لعقود، وإلا رح نضل ندور بنفس الحلقة المفرغة؛ بتتغير المظاهر، وبيضل الواقع رهينة بإيد اللي بيعرف يتلون أكتر على حساب المصلحة الوطنية العامة.

ليست هناك تعليقات:
إرسال تعليق