تدمر سورية لا عربية
قاهر العرب كان لقب وهب اللات امبراطور تدمر ابن الملك أذينة والملكة زنوبيا
تدمر هي المملكة السورية المحلية الوحيدة اللي قدرت توحد كل سوريا الطبيعية، وتدمر هي الوحيدة بسوريا اللي كان حكامها بشيلوا لقب الأباطرة.
هاد المقال هو للرد على مجموعة من اللي بسموا حالهن مؤرخين واصدروا مجموعة من الأكاذيب والمغالطات بحق وحدة من أهم الممالك بتاريخ سوريا، هي الأكاذيب اللي كانت بتعتمد على حقائق مجتزئة أو فهم مغلوط ودراسات بتفتقد للموضوعية وما بتستند لأي دراسة أكاديمية مستقلة بتهدف لتعريب تدمر ونزع الصفة الآرامية.
تدمر مملكة آرامية سورية بحتة وأصل تسميتها آرامي ܬܕܡܪܬܐ تدمورتا وبتعني بالعربي المعجزة، وسكانها التدمريين بأغلبيتهن الساحقة آراميين وزنوبيا آرامية وأصل اسمها مو زينب متل ما اتدعى صحفي خليجي بكل وقاحة وبدون أي دليل حقيقي.
بكل تدمر ما في أي نقش بقول أنو سكان تدمر من العرب بس على العكس في نقوش بتشير أنو ملوك تدمر كان يصفوا حالهن بالمنتصرين على العرب Arabicus Maximus وبالتالي واضح أنو ما اعتبروا حالهن عرب، وكان ابن زنوبيا وأذينة الامبراطور وهب اللات لقبه "قاهر العرب". (نحن ما منشجع هيك تسميات عم ننقل حقائق تاريخية)
بالواقع ما ممكن نفي وجود العنصر العربي في تدمر بس جعل تدمر عربية من الناحية الثقافية والعرقية لوجود شوية عرب فيها تزوير تاريخي، فالمكون العربي متلو متل المكون اليهودي واليوناني اللي كان فيها وداب بالمجتمع التدمري الآرامي، وتدمر مدينة سورية بحضارة سورية بحتة وكل المكونات التانية صارت تعتبر حالها تدمرية وهاد الكلام هو نتيجة التنقيبات المباشرة مو كتابات المؤرخين القدامى الغير معاصرين للأحداث واللي كتاباتهن مزج بين الخيال والحقيقة متل الطبري والتاريخ الأوغوسطي...إلخ.
التركيب العرقي لتدمر
كان مكون من أربع قبائل كبرى بتضم تحت جناحها عشرات العشائر، القبائل كانت 3 منها آرامية هي (ماتابول - كومارا - ميثا) وقبيلة وحدة عربية هي قبيلة معزين.الديانة في تدمر
من بين عشرات الالهة التدمرية كان في عدد قليل من الآلهة عربية ورافيدية أما باقي الآلهة كانت سورية آرامية، العروبيين بيستغلوا وجود الالهة العربية "اللات" في تدمر لتعريب الثقافة التدمرية بس هاد الأسلوب كتير سادج، لإنو كمان الإله السوري "راشاف" انعبد بمصر وهالشي مابيعني إنو المصريين سوريين، وكمان الإله السوري "حدد" دخل عن طريق العموريين لجنوب الرافدين وصاروا الملوك هنيك يستعملوا اسم "أدد" بأسمائهن الملكية وهالشي ما بيعني أنهن صاروا آراميين.العرب جابو الهتهن معهن لتدمر بس اندمجوا مع سكانها الآراميين، وعبدو آلهة السوريين كمان.
كان بتدمر في احترام ديني سائد وتقبل لكل الاعتقادات المختلفة حتى انو التدمريين سمحوا بادخال اللات لمجمع الآلهة في تدمر. "مقال عن التقاليد السورية في الحرية الدينية في تدمر"
اللغة في تدمر
ما انوجد أي نقش عربي بتدمر بل على العكس كل النقوش باللغة التدمرية الآرامية وفي منهن ترجمة يونانية وفي قليل كتير لاتيني، وكانت اللغة السائدة هي الآرامية بلهجة تدمرية وكانت لغة كل سكان تدمر بما فيهن اللي أصلو عربي.
الملكة زنوبيا اسمها باللغة التدمرية إلو صيغتين: باث زباي الآرامي وزنوبيا اليوناني أما اسم الزباء العربي غير موجود إنما اختراع من العصر العباسي.
زنوبيا ما كان اسمها لا زينب ولا زباء، والملكة ما كانت عاجزة عن تدوين اسم الزباء لو كان موجود بس كل النقوش لاسم زنوبيا كان مكتوب بالصيغة الآرامية التدمرية أو بالصيغة اليونانية.
كل شي ذكرناه هو خلاصة الدراسات الأكاديمية ومقالات المنقبين عن آثار تدمر وكل الكتب الصادرة عن أرقى جامعات العالم ودور النشر الأكاديمية العالمية ومن أكبر البروفيسورات الاختصاصيين وممكن الاطلاع عليها بالمصادر.
ليست هناك تعليقات:
إرسال تعليق