أصحاب لقب ملك سوريا

لقب حمله ملوك حكموا إمبراطورية امتدت من الهند إلى بحر إيجه

استخدم لقب ملك سوريا لأول مرة عام 200 قبل الميلاد، يعني قبل اكتر من 2200 سنة، طبعا بوقتها سوريا هي سوريا الطبيعية الممتدة من طوروس للعقبة.

كانت سوريا مقسومة بين البطالمة اليونانيين الحاكمين لمصر "مؤسسي الاسكندرية" والسلوقيين اليونانيين الحاكمين لسوريا "مؤسسي أنطاكيا"، بس بمعركة "بانيوم" أو المعروفة تاريخياً بالحرب السورية الرابعة قدر الملك السلوقي انطيوخوس التالت يهزم البطالمة ويوحد سوريا تحت سيطرته ومن هديك اللحظة صاروا المؤرخين القدامى يذكروا الملك السلوقي كـ "ملك سوريا".

بسبب أنو السلوقيين ما كتبوا على عملاتهن هاد اللقب ولا أي لقب تاني بيربطهن بجغرافيا فكان الاعتقاد إنهن ما استعملوا هاد اللقب وإنما المؤرخين المعاصرين إلهن دعوهن فيه، وهاد الشي كان بسبب ضعف التنقيبات بس بعدين تم اكتشاف نقش كتير مهم أثبت إنو ملوك السلوقيين كان لقبهن الاساسي هو ملك سوريا، وإنهن استعملوه فعلا ببلاطهن، وهاد النقش تم اكتشافو بغرب تركيا ومكتوب عليه:

"انتيغونوس ابن مينوفيلوس، ادميرال الكساندر، ملك سوريا" الكساندر المقصود هو الملك السلوقي الاسكندر الأول بالاس.

هاد اللقب كمان منشوفو بالترجمة اليونانية للتوراة وتم استخدامو للدلالة على ملوك مملكة آرام دمشق بس هالملوك ما استعملوه طبعا لأنو بوقتها ما كان اسم سوريا سائد.

الملوك السلوقيين يللي حملو لقب ملك سوريا هنن:

أنطيوخوس الثالث - سلوقس الرابع - أنطيوخوس الرابع - أنطيوخوس الخامس - ديميتريوس الأول - الكساندر الأول بالاس - ديميتريوس الثاني - أنطيوخوس السادس - ديودوتوس ترايفون - أنطيوخوس السابع الكساندر الثاني - زابيناس أنطيوخوس الثامن - أنطيوخوس التاسع - سلوقس السادس - أنطيوخوس العاشر - أنطيوخوس الحادي عشر - ديميتريوس الثالث - فيليب الأول - فيلادلفوس أنطيوخوس الثاني عشر - سلوقس السابع - أنطيوخوس الثالث عشر - فيليب الثاني فيلوراميوس.

آخر شخص استخدم اللقب هو فيصل الهاشمي لما تم اعلان المملكة السورية عام 1920 بعد الثورة العربية الكبرى وخروج العثمانيين من سوريا.

المفارقة أنو لقب ملك سوريا ما استخدمه أي سوري فأول الملوك اللي استخدموه كانوا السلوقيين اليونان وآخر حدا استخدمه كان الملك فيصل الهاشمي العربي.

السلوقيين كانوا متمركزين في سوريا اللي كانت عاصمتها أنطاكيا بوقتها وامتدت دولة السلوقيين من الهند شرقاً لبحر إيجه غرباً، وبالتالي كان ملوك سوريا حاكمين كل هي المنطقة.