أسطورة العادات المشتركة
هل حقاً عادات السوري والعربي عادات واحدة مشتركة؟
كانت دائما مناهج التعليم السورية بتحكي أنو السوريين هنن عرب وعندهن عادات وتاريخ مشترك بس هاد الشي لأي حد هو واقعي وحقيقي؟
من أشهر الشغلات اللي بتميز عادات الشعوب عن بعضها هي طريقة السلام والتحية وهون منشوف الفرق الكبير بين التحية السورية والتحية العربية.
عند السوريين التحية بتختلف بين محافظات سوريا بس التحية الأكتر شيوعاً بين السوريين بدمشق وحلب هي التقبيل من الخد مرتين مرة من اليمين ومرة من اليسار، وفي لبنان 3 قبلات مرة يمين ومرة يسار ومرة تانية يمين وفي الأردن وبعض مناطق سوريا قبلة على اليمين وقبلتين أو أكتر على اليسار، ودائماً في تقضيل للخد الأيسر.
عند العرب الموضوع مختلف تماماً فالتحية بتكون بتقبيل الأنف وهاد تعبير عن الاحترام حسب الأعراف والتقاليد العربية وبتنتشر بشكل كبير في الامارت واسمها "مواية" أو "السلام بالخشوم" وطبعا هي العادة متوارثة من زمان كتير عند العرب وحافظت عليه بعض العشائر العربية في سوريا.
الشي التاني اللي ممكن يختلف باختلاف الثقافة هو الرقص الشعبي، فالرقص الشعبي في سوريا الطبيعية متل مو معروف هو الدبكة واللي بتتنوع حركاتها بين المحافظات واللي ألها ألحان وأغاني خاصة كتير من الفلكلور السوري. مقال كامل عن الدبكة وأصلها وأصل تسميتها "الدبكة أقدم رقصات العالم".
الرقصات الشعبية سواء في سوريا الطبيعية أو في شبه الجزيرة العربية كل وحدة منها ألها زيّها الخاص واللي بيرجع لثقافة وتراث وفلكلور البلد.
الاختلافات بين السوريين والعرب بتتعدى التحية والرقص والموسيقى والزي الشعبي وبتصل حتى المطبخ بتنوع الأكلات واختلافها وحتى اختلاف طريقة تناولها!
في اعتقاد سائد في سوريا انو الأكل بالملاعق تعلمو السوريين من الفرنسيين وهاد الشي غلط لأنو الأكل بالملاعق في سوريا من قبل الميلاد حسب الآثار الموجودة في سوريا ومحتمل يكون من عهد الرومان والأغريق وممكن قبل كمان، بس الأكل بالأيد هو عادة عربية لهلأ موجودة وحافظت عليها بعض العشائر العربية في سوريا لليوم.
الاختلافات الثقافية أكتر من الشي اللي انذكر بهاد المقال واللي انذكر فيه أمثلة بس لازم نعرف أنو هي الاختلافات طبيعية فالسوريين مو عرب والعرب مو سوريين وكل شعب عندو ثقافتو الخاصة، وعاداتو الخاصة، واللي بفتخر فيها وبتميز فيها، وما في داعي نكون كلنا بلون واحد، وما في داعي حدا يلغي حدا، فالتنوع الثقافي بيعطي نكهة لهي المنطقة المنهكة من الحروب والقتل.
ليست هناك تعليقات:
إرسال تعليق