أغلب أسماء القرى والبلدات في سوريا الطبيعية من اللغة سريانية

محافظة ادلب:

محافظة حلب:

بحورتة: بتقع بمنطفة أعزاز ناحية أخترين وكلمة بحورتا بالسرياني بتعني الفاحصة.

بينيامين: بتقع غرب مدينة حلب والتسمية سريانية اختصار لـ بناي يمينو وبتعني أبناء اليمين يعني أبناء الاستقامة  والصلاح والخير.

جبرين: بتقع شرق مدينة حلب جنب مطار حلب الدولي وفيها أكبر سوق للمواشي وصارت مع تمدد المدينة حي من أحياء حلب والتسمية سريانية وبتعني الرجال (جمع رجل).

عفرين: بتقع بالريف الشمالي لحلب وعفرين باللغة السريانية هي جمع لعفر أو عفرو واللي بيعني التراب والغبار. في مقال كامل عنها بعنوان: "عفرين ومسلتها التاريخية"

محافظة طرطوس:

باشيشا: بيت شيشا أو بيت شيشو واختصارها باشيشا وهي كلمة آرامية سريانية بتعني بيت الرخام.

حابا: حابا أو حابو اسم آرامي سرياني وبتعني بالعربي المكيال، بتضم القرية مقابر رومانية وفيها مزار القديس سمعان العمودي والمقبرة بجانبو برجعو للقرن الخامس والسادس الميلادي.

كفرون: كفر بالسريانية القرية وكفرون هو تصغير للقرية يعني صارت بتعني القرية الصغيرة.

محافظة دمشق:

كفر سوسة: مع تمدد مدينة دمشق صارت كفر سوسة حي من أحياء دمشق اليوم اسمها مؤلف من كلمتين كفر وبتعني القرية وسوسة وأصلها سوسية وبتعني الخيل (الحصان) يعني اسمها بالسرياني مزرعة أو قرية الخيل.

محافظة ريف دمشق:

بزينة: تابعة لدوما ناحية النشابية والاسم اختصار لكلمة بيت زَينا وبتعني بالسرياني خزان أو بيت السلاح.

داريا: التسمية سريانية بمعنى البيوت الكتير.

دوما: اليوم وحدة من أهم مدن ريف دمشق وبترجع للعصر الآرامي ومعنى اسمها السقف باللغة السريانية.

زملكا: بتقع بمنطقة دوما وأصلها زم ملكا يعني صوت الملك بالسريانية.

صحنايا: بتتبع لداريا وبتعني بالسريانية البلدة الصاحية لصحاوة جوها وصحاوة سكانها أو ممكن تكون معناها الصحن بالآرامي بسبب شكلها وموقعها الجغرافي بين الجبال متل الصحن.

صيدنايا: في كتير روايات حول معنى اسمها بس الأرجح هو أنو الكلمة بتعني مكان صيد الغزال حسب اللغة الآرامية السريانية.

قطنا: التسمية آرامية سريانية وبتعني المكان الضيق أو الزغير. بتضم قطنا مدافن ملكية مقالة كاملة عنها : "مدفن قطنا"

معربا: بتتبع لمنطقة التل وفيها قبور وآثار وقناة مائية من العصر الروماني ومعنى اسمها باللغة السريانية المغرب.

لبنان:

أرنون: تابعة لمحافظة النبطية، وبتعني التيس الصغير، أرنو هو التيس الجبلي أما أرنون فهي تصغير للتيس الجبلي.

فاريا: موجودة في قضاء كسروان بمحافظة جبل لبنان وهي تسمية سريانية بتعني الشجرة المثمرة.

كفر قوق: بتقع في قضاء راشيا في محافظة البقاع وبتعني بالسريانية قرية أكواز الصنوبر.

فلسطين:

بيت عنيا: تابعة للقدس ومذكورة بالأنجيل وزارها السيد المسيح واسمها سرياني بيعني بيت التراتيل أو الغناء.

بيت لاهيا: موجودة بقطاع غزة وهي قرية قديمة كتير فيها آثار رومانية تابعة لمحافظة شمال غزة والمعنى بالسرياني لاسمها هو بيت الآلهة. 

معليا: بتقع بمنطقة الجليل شمال فلسطين والتسمية سريانية بتعني العالي أو الرقيع أو السامي أو المتعالي.