دريكيش محطة السوريين الصغيرة
مدينة فينيقية أصل تسميتها آرامي غزاها الفرس واليونان والرومان والعرب
دريكيش مدينة سورية زغيرة تابعة لمحافظة طرطوس اليوم، اسمها مشتق من اللغة الآرامية القديمة واللي بتعني المحطة الزغيرة، لأنها كانت محطة استراحة بنص المسافة بين مملكة أرواد الفينيقية ومعبدها في "حصن سليمان" شرق دريكيش.
بعتقد أنو أول حدا سكن منطقة دريكيش كانو الفينيقيين قبل الميلاد وحصن سليمان الأثر الفينيقي واحد من أهم آثارها، تناوبت ممالك آرامية السيطرة عليها قبل ما يهاجمها الفرس وحكموها حتى سقطت بأيد اليونانيين عام 333 قبل الميلاد بقيادة الإسكندر المقدوني.
سيطر عليها الرومان بعد ما طلع منها السلوقيين (اليونانيين) عام 64 قبل الميلاد، وضلت دريكيش خاضعة لسيطرة الرومان حتى الغزو العربي لسوريا بالقرن السابع الميلادي، وقتها دخلها العرب بقيادة عبادة بن الصامت النوفلي بأمر من عبيدة بن الجراح.
كانت بلاد صافيتا اللي مركزها دريكيش بتمتد من سهل عكار للبيرة ومن تلكلخ للشيخ بدر ومنطقة طرطوس.
دخلها الصليبيون عام 1099 وبنو فيها الأديرة والحصون متل برج صافيتا وبرج تخله، وبعام 1170 ضرب دريكيش زلزال دمر فيها كتير من الأبنية التاريخية، وفي عام نهاية القرن 12 سيطر الأيوبيين على سوريا وطالعو منها الصليبيين، وسيطر المملوكيين بقيادة الظاهر بيبرس على على برج صافيتا وبرج تخله وقلعة الحصن.
احتل العثمانيين سوريا عام 1516 وعملو من بلاد صافيتا قائمقامية مركزها دريكيش وتناوبت دريكيش مع صافيتا كمقر لحكم جنوب الساحل السوري وكان اسمها برمانا وبتتبع لواء طرابلس الشام.
بعام 1832 دخلها إبراهيم باشا اللي فرض على سكان المنطقة ضرائب كبيرة أشعلت ثورة شعبية ضده بقيادة آل شمسين اجبرته أنو يطلع منها بعد 6 سنين بعد ما حرقها وتسبب بموت عدد كبير من سكان المنطقة.
رجّع العثمانيين الضرايب وثار سكان دريكيش والمنطقة مرة تانية عام 1858 قمعتها قوات الاحتلال العثماني بعنف وكانو يعدمو الثوار السوريين بشلفهن من فوق برج صافيتا وساهمت هي الأوضاع بهجرة كتير من سكان المنطقة للأمريكيتين ورغم أنو العثمانيين قدرو يطفو الثورة بس عطو المنطقة حكم ذاتي.
بعد فترة قصيرة من خسارة الثمانيين بالحرب العامية الأولى وطلوعهن من سوريا دخل الجيش الفرنسي دريكيش عام 1919 بقيادة الكابيتان رساك والكابيتان فيو.
حاول الفرنسيين بفترة احتلالهن سوريا يخلو دريكيش مركز لقواتهن بس ما قدرو بسبب مقاومة الأهالي الهن بكل المناطق، وبعام 1920 تحولت دريكيش لناحية وتم اهمالها بهداك الوقت.
صار بدريكيش حركة مدنية – اجتماعية بعد الاستقلال عن فرنسا عام 1946، واستمرت لنص الخمسينات.
اتسمت هي الحركة بحركة الإصلاح الريفي، وكان كل أعضاءها نشطاء شباب مثقفين، انتسب بعض أعضائها للأحزاب السياسية اللي كانت نشطة بهديك الأيام، متل الحزب الشيوعي والقومي السوري.
دريكيش غنية بينابيع وفيها 12 نبع، وهي من أكتر الينابيع غزارة بمدن الساحل السوري، وأحواض المي المعدنية اللي فيها كانت مقصد لكتير سوريين للعلاج،
ارتبطت أسماء معظم هي الينابيع بالمنبع والمصب وطريقة الجريان، فمثلاً نبع (عين الفوقة) هو نبع رئيسي بنبع من أعلى نقطة بجبل دريكيش، لهيك تسمى بهاد الاسم، وبتميز بنقاء ميتو وصفائها وهو معروف على مستوى العالم كمياه معدنية، وما في متلو مثيل بفرنسا وبتصل غزارته لـ 6 إنش.
بتتميز دريكيش بمناظرها الطبيعية وينابيعها وغاباتها بالإضافة للمواقع الأثرية المهمة منها "حصن سليمان"و "قلعة بيت الشيخ ديب" و "قلعة الكيمة" و"برج تخله" وغيرها كتير , كمان بتواجد بمنطقة دريكيش مغارات وكهوف ومن أهمها مغارة بيت الوادي اللي تعتبر من أجمل المغارات بالعالم.
شكرا الك نشرك معلومات مهمةعن مناطق وبلدات سورية
ردحذف