تدمر .. أعظم امبراطورية سورية
الامبراطورية الوحيدة التي استطاعت توحيد كل سوريا الطبيعية تحت حكم سوري واحد
وقت نحكي عن الحضارة السورية بتكون تدمر وملكتها زنوبيا أول شي ممكن يخطر على بالنا، وكيف لأ وهي أعظم تجسيد لسوريا الوحدة تحت حكم سوري خالص، مملكة تدمر هي تجسيد حقيقي وللأسف الوحيد للأمة السورية تاريخياً.
كامل أرض سوريا الطبيعية - شعب سوري متنوع - لغة سورية، وقتها بلغ عدد سكان تدمر، في ذروة ازدهارها وقت حكم الملكة زنوبيا، أكتر من 200,000 نسمة.
تدمر أصل اسمها ܬܕܡܪܬܐ "تدمرتو" ومعناه في اللغة الآرامية "المعجزة".
بعتقد الباحثين أنو أقدم السكان الفعليِين للمدينة كانو الأموريين في بداية الألف التاني قبل الميلاد، ومن بعدهن بلش الآراميين بالاستقرار فيها مع اقتراب نهاية الألفية، أما العرب فكان أول وصول الهن وصل لتدمر خلال نهاية الألفية الأولى قبل الميلاد، ويمكن اثبات وجود العرب في المدينة كان برجع إلى نصوصٍ تاريخية بتعود إلى معركة رافيا، اللي صارت في عام 217 قبل الميلاد.
اندمج العرب الوافدين في المجتمع التدمري وصارو يحكو اللهجة التدمرية كلغتهم الأم، وكانو مستلمين مناصب ومواقع مهمة في الدولة.
عاش في تدمر كمان عدد من اليهود، وكان في كتير أشخاص الهن أسماء إغريقية في تدمر هدول كانو عبيد محرَّرِين، بس قليل كتير منهن كانت الهن جذور عرقية إغريقية حقيقية، لأنو كان من النادر أنو يجي الإغريق للمدينة. ومن المحتمل أنو التدمريِين كانو بكرهو الإغريق، وكان يشوفهن أجانب دخلاء عنهن، وما كانو يسمحو الهن بأنو يعيشو جوا المدينة.
مدينة تدمر نافست مدينة روما والامبراطورية الرومانية ووصل فيها ذروة الازدهار بعهد الملكة زنوبيا وصارت تدمر أهم مدن الشرق وامتدت حدود الامبراطورية السورية لأول مرة خارج حدود سوريا الطبيعية فوصلت مصر بالغرب وحدود آسيا الصغرى بالشرق، ورغم شهرة الملكة زنوبيا، فالقوة اللي وصلتها ما كان ممكن تتحقق بدون زوجها اللي سبقها بالحكم الملك أذينة وهو اللي وحد سوريا الطبيعية بالكامل قبل ما تتوسع زنوبيا بالحدود.
الثقة الزائدة للتدمريين وللملكة زنوبيا كان السبب في نهاية الامبراطورية وسقوطها ولمزيد حول هاد الموضوع ممكن الاطلاع على المقالة السابقة "الكاتافراكت سلاح تدمر الذي دمرها"
ليست هناك تعليقات:
إرسال تعليق