معاني أسماء الأشهر السورية
أسماء الأشهر السورية تستخدم فقط في سوريا الطبيعية ويعود أصلها إلى اللغة السريانية
بستخدم السوريين التقويم الشمسي قبل الميلاد وأشهر السنة الشمسية كلها بأسماء سورية قديمة مستخدمة لليوم أصل تسميتها بشكل عام من اللغة السريانية اللغة الأم لسوريا، بعض الكلمات في اللغة السريانية ورثتهن من اللغات الأقدم بالمنطقة متل الأكادية والكنعانية.
هي الأشهر مستخدمة بشكل رسمي في سوريا ولبنان وفلسطين والأردن بالإضافة للعراق وبعضها متل (نيسان - أيلول - تموز - شباط -حزيران) مستخدمة باللغة التركية وعدة لغات في وسط وغرب آسيا.
كانون:
شهر الحمل والراحة حسب السنة الميلادية فآخر شهر بالسنة هو كانون الأول وأول شهر بالسنة هو كانون الثاني وحسب الترتيب السوري للأشهر بكون كانون الشهر التاسع والعاشر واللي بصادف شهر الشتا والبرد في سوريا وأصل التسمية من الجذر (كن) الأكادي ومعناه الأساس والقاعدة، الثبوت والاستقرار لأنو بهي الفترة كان كتير ناس بكنّو ببيتهن وهاد مصطلح مستخدم في سوريا للآن.
من أشهر الأمتال الشعبية السورية اللي بتنقال عن كانون: "عرس المجانين بكوانين" وبستخدم هاد المتل وقت حدا يعمل شي مو بوقتو متل المجنون و "أبرد من مية كانون" بتم استخدامو لوصف الأشخاص اللي أعصابهن باردة.
شُباط:
شهر الطوفان من الجذر الأكادي والسرياني (شبط) أي بالعربية ضرب وهو مصطلح كمان مستخدم في سوريا لليوم وسبب تسمية هاد الشهر بشباط بسبب بوردتو اللي بتشبه الضرب على الجلد وترتيبه حسب الأشهر السورية القديمة الـ 11.
من أشهر الأمتال الشعبية السورية اللي بتنقال عن شباط "شباط اللباط .. ما على كلامو رباط" وبستخدم لوصف الأشخاص اللي بتغير رأيهن بشكل مستمر ومفاجئ متل شهر شباط اللي ممكن تختلف درجات حراراتو بين يوم ويوم ويتغير الطقس بين ماطر ومشمس خلال ساعات قليلة.
آذار:
شهر الأرواح الشريرة مشتق من الجذر الأكادي (هَدَر) وسبب تسميتو بسبب العواصف اللي ممكن تصير فيه بنهاية الشتاء بسوريا حتى في مقولة شعبية مستخدمة اليوم عنو "آذار الهدار" وهو بالنسبة للسوريين القدماء بمثل نهاية السنة والشهر الأخير مع نهاية الشتاء فيه.
ومن أشهر الأمتال العشبية السورية عن شهر آذار "خبي حطباتك الكبار لشهر آذار" بسبب أنو كانت الناس تفكر أنو لما يجي آذار يعني خلص الشتا وصار دفى وهاد الشي بسوريا مو صح ممكن يصير ايام باردة كتير بآذار كمان وخصوصاً بنصو الأول.
نيسان:
شهر السعادة كمان أصلو أكادي وبيعني البداية والتفتح وهو شهر الربيع وكان هو الشهر الأول عند السوريين القدماء وبيعتبر بدايتو بداية السنة الجديدة وعيد الراس السنة المعروف بعيد الأكيتو.
ومن أشهر الأمتال عن شهر نسيان "أمطار نيسان بتحي قلب الانسان" كون المطر بشهر نيسان ضروري كتير للمزروعات قبل بداية موسم الحصاد.
أيار:
شهر الحب أكادي الأصل بمعنى النور والضياء والدفء، كون بشهر أيار بصير ذروة فصل الربيع، وبداية ارتفاع درجات الحرارة، وباللغة العربية في كلمة قريبة ومشتقة من أيار موجودة بالقواميس وهي "أوار"يعني شديد النور.
من أشهر الأمتال الشعبية السورية عن شهر أيار " في أيار بيتطير الغمار" يعني بأيار بطير كل شي وهاد كان للدلالة أنو بشهر أيار بصير رياح كتير، وكانت تزعج الفلاحين السوريين لأنها أحيانا بتسبب أذى للسنابل والمزروعات.
حزيران:
شهر البناء حزيران لفط سرياني بمعنى الحنطة أو الحصاد أو السنابل، ومتل ما هو معروف فهو شهر بداية حصاد القمح عند السوريين.
من أشهر الأمتال الشعبية السورية عن شهر حزيران " في حزيران بصير العجين خمران" وهاد بدل على الحرارة الشديدة اللي بتصير بشهر حزيران، لدرجة أنو العجين بتخمر وبصير جاهز للخبز.
تموز:
شهر الحصاد أصل التسمية من اللغة البابلية - السومرية وكلمة تموز هي بتعني ابن الحياة أو الابن البار وهو اسم الإله السومري اللي برجع للحياة بعد الموت وبهاد الشهر تحديداً بموت الإله بسبب الحر والجفاف اللي بصير فيه بسوريا ومنطقة الهلال الخصيب.
ومن أشهر الأمتال الشعبية السورية عن شهر تموز "بتموز بتغلي المي بالكوز" وهو للدلالة على ارتفاع درجة الحرارة لدرجة أنو المي ممكن تغلي.
آب:
شهر نضج الثمار آب أو أبّ حسب الأكادية بمعنى النبت والكلأ، وباللغة السريانية بتعني آب الغلال والثمر الناضج، لأنو هو الشهر اللي بجمع فيه الفلاحين السوريين غلتهن من الحصاد اللي صار بالصيف.
من أشهر المقولات الشعبية السورية عن شهر آب "آب اللهاب" بسبب الحرارة العالية اللي بتصير بشهر آب وهو أشد الأشهر حرارة في سوريا الطبيعية والهلال الخصيب.
أيلول:
شهر نثر البذور ورد اسم أيلول في اللغة السريانية واللغة العبرية، والأصل هو أكادي وبيعني الصراخ والولاويل لأنو بهاد الشهر كانت تصير المناحات على الإله تموز حسب الديانات السورية القديمة.
وأشهر المقولات الشعبية السورية عن شهر أيلول "أيلول دنبو مبلول" للإشارة أنو بنهاية شهر أيلول ألا ما ينزل مطر وهو بداية فصل الخريف.
تشرين:
شهر العطاء وإيقاظ البذور المدفونة حسب التقويم الميلادي فالشهر العاشر تشرين الأول والشهر 11 تشرين التاني وأصل كلمة تشرين سريانية (تشري - تشراي) وبالأكادية ( تاش - ري - توم) ووبرجع لجذر سامي مشترك بقابلو باللغة العربية (شرع)، وهو بداية الشتاء وهو شهر الحرث والزرع قبل ما يجي كانون.
من أشهر الأقوال الشعبية السورية عن تشرين "برد تشرين أحد من ضرب السكين" بسبب أنو العالم بتكون متهودة على الجو الدافي وفجأة ببلش البرد في شهر تشرين فبكون غدار حسب السوريين وبتحول الطقس لبارد فجأة.
ليست هناك تعليقات:
إرسال تعليق