فلاما السوري المصارع الأسطوري

من أسير إلى أسطورة المصارعة في حلبات روما، رفض الحرية لأجل المجد

فلاما (Flamma) مصارع سوري في عهد الإمبراطورية الرومانية خلال حكم الإمبراطور هادريان اللي حكم من عام 117 حتى 138، ويعتبر فلاما واحد من أشهر وأنجح المصارعين بهداك الوقت، ويمكن بتارخ روما كمان.

رغم أنو ما في مصادر وروايات دقيقة عن بداية حياتو بس مرجح أنو كان فلاح بسيط بسهل حوران، وبعدها قاتل ضد الجيش الروماني اللي دخل سوريا، تعرض فلاما للأسر بعمر الـ 17، وأخدوه الرومان من سوريا لروما لمعسكرات التدريب مشان يكون مصارع يستمتع الجمهور فيو، وهي عادة رومانية كانت تخلي العبيد يقاتلوا بحلبات المصارعة حتى الموت قدام عيون الجماهير، بس على عكس باقي العبيد والمصارعين اللي كانوا يموتوا بحلبات المصارعة بأول كم نِزال، فلاما السوري فاجئ الكل بقوتو وجبروتو، وقدر يثير إعجاب الرومان.

فلاما السوري قدر يفوز بـ 25 نزال، وحقق شي ما قدر يحققو غيرو، وفاز بجائرة السيف الخشبي 4 مرات (The Rudis) وهي جائزة بتقدر تخلي المصارع الأسير أو الغلادياتر (gladiator) يشتري حريتو فيها، ويترك حلبات المصارعة، بس فلاما أدمن المعارك، وصار يحب المصارعة، فرفض يترك حلبات المصارعة ويعيش كمواطن عادي بالإمبراطورية الرومانية بكل مرة كان ياخد الجائزة فيها.

ضل فلاما يقاتل بحلبات المصارعة لمات فيها بعمر الـ 30 سنة. حب الغلادياتر فلاما المجد والبطولات الشخصية والشهرة اللي حققها بروما، وفضّل يقاتل للموت على أنو يعيش كمواطن عادي.

فلاما متل كتيرين من الشخصيات السورية بالعصر الروماني ما سمع عنها أغلب السوريين، ونسبها البعض لشعوب وقوميات تانية لأسباب لغوية أو دينية رغم أنو شاهدة القبر تبعو بتقول أنو هو سوري، وهي أهم مصدر معروف بييحكي عن حياتو وإنجازاتو.

شاهدة قبر البطل السوري في جزيرة صقلية الإيطالية مكان دفنو ومكتوب عليها:

"فلاما، سيكوتور، عاش 30 سنة، قاتل 34 مرة، فاز 21 مرة، تعادل 9 مرات، فاز بالتأجيل 4 مرات، سوري بالجنسية. صنع Delicatus هاد لرفيقو الجدير بالسلاح ".

المصادر:

(1)

(2)

(3)