المشرق السوري مهد الزراعة
يوجد في بلاد الشام أقدم أنظمة متقدمة للري وتصريف المياه في العالم
الإنسان القديم كان بيعتمد على الملاحظة والتعلم الدقيق، ووحدة من النظريات اللي بتحكي عن اكتشاف الإنسان للزراعة بتقول، أنه الإنسان القديم كان يلاحظ أثر براز الحيوانات وحتى نفسه بعد أكل ثمار بتحمل بذور، وكان بيلاحظ أنو كان بيصير نمو للنباتات بنفس المكان اللي بتم وضع البراز فيه، ومن هون أجت فكرة الزراعة.
بعد سنين طويلة قضّاها الانسان بيأمن غذاؤه عن طريق الصيد والتقاط الثمار والحبوب البرية صار شي سماه علماء التاريخ "الثورة النيوليتية" اللي أدت للإستقرار واكتشاف الزراعة وتدجين الماشية، وهي الثورة كانت البداية الحقيقية لحضارتنا الحالية، ورغم أنو كل الحضارات بوقت ما من تاريخها حققت هالثورة إلا أنو الحفريات الأثرية أثبتت أنو بشائر هالنقلة المهمة والاستقرار الزراعي انطلقت من سوريا الجنوبية في منطقة فلسطين ووادي الاردن. (1)
وأثبت علم الآثار الحديث أنو الزراعة ظهرت لأول مرة في سهول سوريا الداخلية وسفوح زاغروس الغربية شرقي وادي الرافدين. (2) وكمان تم الاتفاق على أنو أولى التجارب الزراعية تمت في المناطق الداخلية من سوريا على طول الشريط الممتد من جنوب حلب لصحراء سيناء، وبيعتقد أنو أوائل المواقع اللي اعتمدت عالزراعة بشكل كبير هنن (تل المريبط) اللي بيبعد 80 كم جنوب شرق حلب وأريحا في فلسطين وكانوا من البؤر الحضارية الأولى اللي شهدت الثورة النيوليتية وضلوا مسكونين من 8350 قبل الميلاد تقريباً لمدة ألف سنة. (3)
بيعتبر تل السلطان بمدينة أريحا من أكتر الاماكن الغنية بالمعلومات الأثرية والثقافية بالعالم، بحيث أنو الموقع بيملك أدلة قوية على وجود مستوطنات بشرية متقدمة بترجع للعصر النيوليتي قبل حوالي 11000 سنة. واللي بيميز تل السلطان وجود أنظمة متقدمة للزراعة والري واللي تعد من أقدم ما تم اكتشافه في العالم. بحيث أنه كانوا سكان هديك المنطقة بيستغلوا مصادر المياه بطريقة منظمة، عن طريق بناء قنوات ري وتصريف للمياه واللي مكنهن من زراعة المحاصيل بشكل مستمر داخل بيئة شبه صحراوية. (4)
العالمة البريطانية Kathleen Kenyon، كانت من أبرز العلماء الي نقبوا بمنطقة تل السلطان، وأسهمت اكتشافاتها بأحداث ثورة علمية كشفت عن الطرق الفريدة والمتقدمة لسكان المنطقة بهداك الوقت اللي مكنتهن من تطوير طرق رائعة وذكية ومتقدمة للزراعة. (4)
هي الاكتشافات بتسلط الضو على التقدم اللي كانوا بيمتازوا فيه سكان بلاد الشام بعد العصر الجليدي واستيطانهن لهديك المناطق واكتشافهن لطرق متقدمة بهداك العصر، مكنتهن من الزراعة حتى بالبيئات القاسية، بالإضافة لطرقهن الفريدة ببناء الحصون الدفاعية، وهاد بدل على تنظيم اجتماعي، وتقدم حضاري واضح، وغنى معرفي وثقافي بيتمتعوا فيه سكان بلاد الشام وبيتميزوا فيه عن غيرهن اذا ما كان عن الجميع بهداك الوقت.
المصادر:
(1) charles Redman,the rise of civilzation p. 71- 74(2) James Mellaart - Catal Huyuk p.16
(3) James Mellaart - The Neolithic of The Near east p.274
(4) الفيلم الوثائقي The best of civilization- The first Farmers (2000 BC to 8800 BC) بين الدقائق 3:50-7:00
(5) لغز عشتار-فراس السواح p. 14 -17
ليست هناك تعليقات:
إرسال تعليق