كيف حاول النظام السابق السيطرة على الشعب السوري؟

نموذج العضة هو نموذج بعلم الإجتماع بيشرح طريقة السيطرة على الشعوب درسها عالم الاجتماع الامريكي من أصول لبنانية ستيفان حسن.

النموذج اسمه بالإنجليزي BITE وهو اختصار لاربع كلمات (Behaviors, Informations, thoughts, Emotions) وترجمتهن هي (السلوكيات، المعلومات، الافكار، العواطف)

بالمقال هاد رح نشرح كيف النظام السابق طبق النموذج - حسب المعايير الي حطها الدكتور ستيفان حسن - ليسيطر عالشعب السوري مشان نكون واعيين ونحذر من تطبيقه علينا مرة تانية من اي نظام تاني.

1.  التحكم بالسلوك:

- السيطرة على الحركة اليومية: نظام البعث كان يفرض نقاط تفتيش (حواجز) ويفرض رقابة امنية شديدة عالمواطن بحيث كان الجواسيس والمخابرات بكل مكان. بالإضافة لمنعه الشباب من السفر عند سن معين. 

- إجبار الناس على النشاطات: النظام كان يجبر الطلاب والموظفين على حضور مسيرات تأييد الرئيس السابق بشار الاسد، وكان يجبر الشباب على الانضمام لجيشه.

- التحكم بالسكن: سكان الاحياء المعارضة للنظام كان بيتم تهجيرهن بباصات خضر لمدن تانية، وصار محاولات قبل الثورة بتغيير ديموغرافية بعض المدن والمناطق لأسباب تركيز سيطرته عليها.

هي ابرز الامثلة لكيف النظام كان يسيطر على سلوك المواطن.

2. التحكم بالمعلومات:

- إحتكار الإعلام: كانت كل التلفزيونات والصحف بإيد النظام وتحت سيطرتو. وكان ممنوع على اي صوت معارض انو يطلع وينتشر. واللي بعارض النظام بيتم اعتقالو وتصفيتو.

- التضليل الإعلامي: كلنا سمعنا مذيعة قناة الإخبارية السورية وهي بتنقل خبر مظاهرة شعبية ضد النظام على انو "وقفة شكر لله على المطر". حتى وقبل سقوط النظام بيوم كانوا بيمارسوا التضليل الإعلامي وبيقولوا انو جيش النظام عم يحرز تقدم. الكذب مو الاسلوب الوحيد الي كان بيتبعه النظام للتضليل، كمان شيطنة المعارضين واتهامهن بالخيانة والعمالة والإرهاب اسلوب تاني اتبعه النظام، هيك المتلقي ما بيشوفهن كناس عاديين عندهن رأي مختلف، بل بيشوفهن على انهن ارهابيين وخونة وبيستاهلوا كلشي بيعمله النظام فيهن.

- مراقبة الإنترنت والاتصالات: متل ما الجواسيس كانت منتشرة بالشوارع، عالانترنت كان في جواسيس وظيفتها التبليغ على اي شخص نشر بحسابه آراء معارضة للنظام. وكان مصير الي بينشر شغلات معارضة هو الاختفاء القسري.

3. التحكم بالتفكير: 

- غرس التفكير الأُحادي: المدارس كانت عبارة عن أداة لغسل ادمغة الأطفال بشعارات النظام البعثية وتلقينهن على حب القائد سواء بالمنهاج الدراسي أو حتى بالباحات والفرص.

- منع التفكير النقدي: أي تشكيك بمصداقية وفعالية النظام كان بيأدي للاعتقال بمساعدة تهم فضفاضة متل "النيل من هيبة الدولة" و"وهن عزيمة الأمة"

- الشعارات المكررة: تكرير كلمة او عبارة متل "الله، سوريا بشار وبس" أو حتى الاغاني الي بتمجد الرئيس هي طريقة شهيرة لغسل الادمغة. فتكرار العبارة بيسهل عالمخ انه يصدق العبارة ويقتنع فيها.

4. التحكم بالمشاعر: 

- خلق الشعور بالخوف: الاعتقالات العشوائية والتعذيب الي بيصير بالسجون بخلي اي مواطن يخاف من انو ينتقد النظام او يعارضه. هالشي شفناه بانتشار عبارة "الحيطان إلها ادنين".

- استخدام العنف العلني: قصف وتدمير مدن كاملة ومجازر الكيماوي هي عقاب للمعارضين وتحذير لاي حدا ممكن يفكر يعارض بالمستقبل شو ممكن يصير فيه.

- التلاعب بالمشاعر الوطنية: النظام كان بيصور حاله على انه "سد المقاومة والممانعة" وانه معارضينه هنن عملاء لاسرائيل وامريكا. هالشي بيحرض المواطن الي بيحب وطنه على المعارضين لاعتبارهن عملاء وخونة للبلد. 

بهي الطرق سيطر نظام الأسد البعثي على الشعب السوري لحوالي 54 سنة، ولو بدنا نطبق كل معايير الدكتور ستيفان منلاقي امور اكتر بكتير. بس حبينا نلخص اهم النقاط ونشرحها، ومنتمنى يكون الوعي زاد عنا، وهي حركات الديكتاتوريين للسيطرة علينا ما ترجع تمشي علينا، لانو نموذج العضة تطبيقه اصعب على الشعوب اللي نسبة الوعي عندها عالي.

المصادر: