ساحلنا حجر الأساس لسوريا التاريخية

التتروبوليس تحالف مدن سورية بطابعها الهلنستي وجذورها الفينيقية الآرامية

دائماً ما كانت سوريا الكبرى وحدة جغرافية وثقافية متكاملة ربطت بين ساحل البحر الأبيض المتوسط والداخل السوري، وكان أبرز شاهد على هي الوحدة هو التتروبوليس السوري، واللي كان عبارة عن تحالف أربع مدن، اللي هنن: أنتيوخيا، سيلوكيا بييرا، لاوديكيا، وأباميا.

هي المدن اللي أسسها السلوقيون بالقرن الرابع قبل الميلاد واللي كانت الركيزة الأساسية لسوريا وكانت جزء ما بيتجزأ من المشهد السوري عبر التاريخ، فبعد وفاة الإسكندر الأكبر بسنة 323 ق.م، صارت حروب بين القادة اللي كانو تحت اسمو لتقسيم الإمبراطورية المقدونية اللي تركها بعد وفاتو.

بسنة 301 ق.م صارت معركة إبسوس بين سلوقس الأول الناصر وأنتيغيوس الأول، وبعد ما فاز سلوقس الأول، صارت سوريا هي مركز الإمبراطورية السلوقية، وهون كان بداية سوريا، الحجر الأساس للإمبراطورية السلوقية.

1. أنتيوخيا (أنطاكية): 

كانت أنتيوخيا هي أول عاصمة لسوريا، وضلت عاصمتها خلال الحقبة الرومانية والبيزنطية حتى قيام الدولة الأموية، وهاد الشي خلاها تكون العاصمة التاريخية لسوريا،

برزت أنتوخيا كأهم مركز بيربط الساحل السوري بالداخل، أسسها سلوقس الأول عام 300 ق.م، وخلال العصر الروماني كانت أكبر مدينة بعد روما والإسكندرية.

سماها سلوقس الأول أنتيوخيا على اسم أبوه (أنتيوخوس)، وبعدين بعد سيطرة الرومانيين والعرب المسلمين على المدينة خفت أهميتيها وتحرفت تسميتها لصارت أنطاكية، وحاليا موجودة بلواء الإسكندرون وعاصمته ومركز ومقصد سياحي هام.

2.سيلوكيا بييريا (السويدية):

سيلوكيا بييريا هي كانت ميناء أنتيوخيا على ساحل البحر الأبيض المتوسط وكانت قريبة منها، ومتل أنتيوخيا، أسسها سلوقس الأول سنة 300 ق.م لتكون قاعدة بحرية تجارية وعسكرية.

سمى سيلوكيا سلوقس الأول على اسمو (سلوكس)، أما بييريا كانت على اسم منطقة بمقدونيا لأنو سلوقس كان بدو المدينة تاخد طابع يوناني. 

عبر العصور خفت أهمية المدينة بشكل كتير كبير وهاد أدى لتكون مدينة مندثرة، وحاليا هي عبارة عن ضيعة زغيرة موجود فيها آثار وتابعة لمدينة السويدية بلواء الإسكندرون.

3. لاوديكا (اللاذقية):

كانت الميناء الرئيسي لسوريا، وهي وحدة من أقدم المدن المأهولة بالسكان لحد الآن، كانت لاوديكيا عبارة عن مركز حضري زغير واسمها راميتا، ولما سيطر سلوقس عليها كبّر المدينة وعملها مركز تجاري وثقافي وميناء مهم، وسماها لاوديكيا نسبةً لوالدة سلوقس (لاوديكي) لتخليد اسمها. 

حافظت لاويديكا على أهميتيها لحد الآن، تحرف اسمها بعد سيطرة عدة امبراطوريات عليها واللغات اللي مرت عليها لحد ما صار اسمها اللاذقية، ولساتها محافظة على أهميتيها بكونها الميناء الرئيسي لسوريا على البحر الأبيض المتوسط، طبعا اللاذقية بسوريا غنية عن التعريف، وهي مركز محافظة اللاذقية على الساحل السوري.

4. أباميا (أفاميا):

أباميا كانت الحصن السوري من الداخل، أسسها سلوقس الأول سنة 300 ق.م بعد ماكنت معسكر عسكري أسسو سنة 320 ق.م على نهر العاصي، وقرر بعدها يحصنها ويكبرها فصارت مركز حضاري وتجاري كتير مهم.

كانت مشهورة أباميا بمعماريتها المميزة وفيها واحد من أكبر الشوارع الرخامية بالعصر القديم. 

كانت أباميا صلة الوصل بين الساحل السوري والداخل وكانت خط الدفاع الأهم من جهة الشرق، سماها سلوقس الأول أباميا نسبة لزوجتو فارسية الأصل (أباما). 

بعد الحضارات اللي مرت عليها واللغات تحرف اسمها بشكل بسيط ليصير أفاميا، بس للأسف التغيير صار أقوى عليها كمدينة لصارت المدينة حاليا عبارة عن موقع أثري بسهل الغاب بمحافظة حماة، بس أثارها اللي موجودة حالياً بتضل دليل أديش المدينة كانت مهمة تاريخيا.

ما كان التتروبولس السوري عبارة عن أربع مدن متجاورة بس فهو كان عبارة عن مشروع سياسي واستراتيجي ضخم وكان حجر الأساس للإمبراطورية السلوقية من معركة أبسوس لما أسس سلوقس الأول سوريا الكبرى، وكانت وحدة متكاملة، أنتيوخيا العاصمة السياسية، وسلوكيا ميناءها، أباميا حصنها، ولاوديكا الميناء الرئيسي تبعها. 

كانت هي المدن حلقة الربط لسوريا بين الساحل والداخل، ضلت هي المدن عم تلعب دورها المحوري خلال قرون من الزمن، لهيك الساحل السوري بكل تاريخو ما كان منفصل عن سوريا، وكان جزء أساسي من نسيجها التاريخي والحضاري والثقافي.