حلب وأحلام القوميين الأتراك
زعيم حزب الحركة القومية التركية: حلب تركية حتى النخاع
اعتبر زعيم حزب الحركة القومية التركي (MHP) دولة بهشلي حليف الحزب الحاكم بقيادة رجب طيب أردوغان أنو مدينة حلب مدينة تركية مسلمة وإجا تصريحو باحتماع خاص بحزبه وقال فيه: "مدينة حلب هي مدينة تركية ومسلمة التاريخ بيحكي، والجغرافيا بتحكي، والحقيقة بتحكي، وأجدادنا بيحكو، والعلم التركي على قلعة حلب بيحكي".
أضاف بهشلي كمان :"قيمة البازار الكبير في اسطنبول هي نفس قيمة أسواق حلب المغلقة" وأضاف كمان :"العلم التركي على قلعة حلب بورجينا أنو حلب تركية للنخاع".
وخفف شوي من لهجته القومية بنهاية كلامه لما قال أنو أرض سوريا للسوريين وأضاف أنو الأكراد هنن أخوتنا وأنو أعدائنا هنن حزب العمال الكردستاني ووحدات حماية الشعب الكردية.
اعتبر بشكل غير مباشر أنو اللي صار بحلب هو عقاب للأسد بقولو:"الأسد ما أخد أيد تركيا الممدودة وسكر أدنيه عن دعوات المصالحة".
زعيم حزب الحركة التركية دولة بهشلي هو زعيم أكبر الأحزاب اليمينية التركية وأقدمها ويعد الحزب التاني ضمن الائتلاف الحاكم بقيادة حزب العدالة والتنمية، ولبهشلي تصريحات عنصرية وتصريحات بتظهر الأطماع القومية التركية متل اعتبار كركوك العراقية مدينة تركية ورغبة انصار الحزب بضم الموصل العراقية وشمال سوريا.
الاعلام التركي الرسمي والغير رسمي كتير بذكر أنو اللغة التركية منتشرة كتير بحلب وأنو أغلب سكان حلب هنن أتراك الأصل، حتى موقع ويكيبيديا بيعطي نسبة التركمان في مدينة حلب %40. "رابط مقال حلب باللغة النركية على ويكيبيديا".
عمل رفع علم تركي على قلعة حلب ضجة كبيرة بوسائل التواصل الاجتماعية التركية واللي شارك فيها سياسيين أتراك واعتبر كتير من المدونين انو حلب هي المحافظة 82 التركية وانتشر على موقع "X " هاشتاغ بهاد الشي وتصدر الترند بتركيا لساعات بـ 2 كانون الأول 2024.
المصادر:
(1)amidahabe
ليست هناك تعليقات:
إرسال تعليق