رشا رزق صوت طفولتنا الجميل
رشا رزق صوت يحي ذاكرة جيل التسعينات والثمانينات
رشا رزق مغنية ومؤلفة موسيقية من مواليد مدينة دمشق 5 آذار عام 1976 ارتبط صوتها عند جيل التمانينات والتسعينات بشارات أفلام الكرتون بعد ما اشتغلت 10 سنين بشركة الزهرة للإنتاج والدبلجة وقدمت معها أعمال كتيرة.
رشا هي شخص موهوب جداً من صغرها. بلشت دراسة الموسيقى بعمر الـ 9 سنين شاركت بعدة فرق شبابية موسيقية أولها فرقة ليزر وبعدها شكلت مع إبراهي سليماني فرقة الأفق اللي صار زوجها بعدين.
اللي ما بيعرفه البعض أنو لرشا رزق أعمال فنية كتيرة بعيداً عن أغاني الأطفال، وعندها أعمال فنية كتيرة بلغات وأنغام متوعة ومختلفة، وكانت أستاذة بالغناء الأوبرالي في المعهد العالي للموسيقى بدمشق.
غنت رشا رزق موشحات وأغاني فلكلورية طربية سورية وغنت أغاني غربية على موسيقى الروك والجاز والبوسا نوفا.
أهم أعمالها الغنائية اللي ضلت بذاكرة السوريين أنا وأخي - دروب ريمي - المحقق كونان - أدغال الديجتال - بوكيمون - بي بليد - القناص - عهد الأصدقاء، وغيرها عشرات الأعمال.
عاشت رشا رزق أغلب حياتها في سوريا بمدينتها دمشق حتى بداية الحرب وبتقيم اليوم ببارس مع عائلتها.
غنت رشا لسوريا بغنية "رح تخلص الحرب"
بأوروبا شاركت رشا كمغنية سوبرانو بأوكسترا كل أعضائها لاجئين ومهاجرين سوريين وكانت فرصة لتعريف الجمهور الغربي على الثقافة السورية بعيداً عن الحرب والدمار واعتبرت رشا بتصريح صحفي أنو هي الفرقة الموسيقية السورية بتمثل الجانب الجيد من سوريا وثقافة سوريا.
شاركت مع زياد الرحباني ببعض حفلاته وكان الها مشاركة سينمائية مع المخرجة اللبنانية نادين لبكي بأفلامها "سكر بنات" و"هلأ لوين؟" قدمت صوتها في فيلم أنيمشن سعودي ياباني بعنوان "الرحلة" في عام 2020.
بعيداً عن الجانب الفني لرشا فهي شخص وطني جدا والحرب السورية أثرت كتير عليها نفسياً متل ما أثرت على أغلب السوريين وساهمت بدعم أبناء بلدها بعدة حملات لجمع التبرعات، وكان ألها دعوة للسوريين بالمخيمات بالامتناع عن انجاب الأطفال بهي الظروف الصعبة واعتبرت الانجاب بهي الظروف جريمة.
موقفها السياسي كان دائما داعم لمطالب السوريين في الحرية والديمقراطية ومعادي لأفكار التطرف الديني والطائفي.
ليست هناك تعليقات:
إرسال تعليق