لماذا نتبنى الفكر القومي السوري؟
ماذا ستحقق لنا القومية السورية وحماية هويتها الوطنية؟
هاد المقال هو للرد على بعض التساؤلات اللي بتجينا بشكل مستمر حول الغاية والفائدة من تبنينا القومية السورية ودفاعنا عن الهوية السورية وتركيز كتير من مقالاتنا عن التاريخ السوري.
للموضوع هاد جانبين الأول بتعلق بسوريا والسوريين نفسهن، والتاني نظرة العالم الخارجي لسوريا والسوريين.
من الجانب الأول منقدر نقول أنو موقع سوريا الجغرافي ووجود التهديدات المحيطة فيها من كل الجهات بتكون فيه القومية عامل للحفاظ على وجود سوريا، وتمييز السوريين كأثنية أو قومية مو لأنهن أفضل، وإنما لأدراك وجودهن واختلافهن، واحترام خصوصيتهن الثقافية كشعب عايش على أرض سوريا من آلاف السنين، وهاد ما بيعطي السوريين كأثنية ميزة أفضلية عن الشعوب التانية وانما اعتراف بالوجود.
الانتساب للقومية السوري مو عنصرية متل ما هو الانتساب للقومية العربية أو الكردية مو عنصرية.
تعريف السوريين بتاريخ سوريا وتاريخ أجدادنا السوريين بيساهم بزيادة الوعي الثقافي من جهة وزيادة المشاعر الوطنية وشغف السوريين بالمساهمة في بناء بلدهن، وزيادة الأمل والثقة بالنفس أنو نحن منقدر نعمل شي متل ما قدر أجدادنا من قبل.
التعلم من دروس التاريخ مهم فكتير من الأحداث التاريخية عم بتعيد نفسها اليوم.
ووجود هوية قومية سورية جامعة لكل السوريين عامل رح يساعد سوريا ويوحد السوريين.
أما الجانب التاني للموضوع فمنقدر نقول لكل شعب وأمة قومية تراث حضاري وثقافي بيلعب دور بتحسين صورة هي البلد، وسمعة شعبها، وهاد بساهم بشكل كبير بتقليل أي نظرة دونية أو عنصرية لهاد الشعب، وإلو فوائد اقتصادية وسياحية محتملة على البلد.
اليوم ذكر كلمة سوريا قدام حدا أجنبي ممكن ترسم بذهنو على الأغلب صورة للحرب والدمار واللاجئين، ورغم أنو هاد الشي فيو شي من الواقع بالغعل، بس ما بيمثل كل الصورة لسوريا اللي عمرها آلاف السنين.
أهمية الهوية القومية لأي بلد بتكون كبيرة وخاصة إذا كان هاد البلد بيمتلك هوية مميزة تاريخياً وثقافياً، فعلى سبيل المثال اسم تركيا ممكن يشكل بأذهاننا صورة للمطبخ التركي والقصور العثمانية والجسور على البوسفور، واسم فرنسا ممكن يشكل بأذهاننا صورة لبرج ايفل وقوس النصر في باريس، ونابليون بونابرت، والعطور الفرنسية، وهيك رغم أنو البلدين عندهن تاريخ استعماري أسود بمنطقتنا وبراتها.
بتساهم سمعة البلد وصورتها الإيجابية أو متل ما يسمى بالقوة الناعمة بدعم السياحة وزيادة طلبات أكتر للبضائع السورية، وبتساعد بتحسين المعاملة مع المواطنين السوريين، وحتى القضايا اللي بتهمهن فبتقدر سوريا تاخد تعاطف ودعم أكبر لقضاياها لما بتكون الصورة عن سوريا والسوريين أفضل.
سوريا هي مو بس دمار وفقر وشعب منهك، سوريا هي بلد الفن الموسيقى والتاريخ، سوريا هي الدراما المبدعة والأكل الطيب، هي البلد اللي قدم للبشرية الكتير من الاكتشافات والابتكارات والشخصيات اللي ساهمت بالحضارة الإنسانية، سوريا هي بالفعل بلد غني بالتراث والآثار والطبيعة الساحرة.
بالختام الانتساب للقومية السورية بالنسبة إلنا هو شعور الفرد أنو هو سوري وبس، وأي حدا بعتبر حالو سوري بكون سوري بالنسبة النا، أما المقالات عن تاريخ سوريا فالغاية منها زيادة الوعي والثقافة عند السوريين، وللتعريف بسوريا أكتر عند غير السوريين، مو بس مجرد استعراض.
حركة الأمة السورية هي حركة قومية سورية مؤمنة بسورية سوريا وبتشتغل على حماية الهوية القومية لسوريا إذا حبيتوا تكونوا جزء منها اطلعوا على المبادئ من هون: "مبادئ حركة الأمة السورية"
"تم تعديل المقال بتاريخ 16 تشرين الأول 2025"
ليست هناك تعليقات:
إرسال تعليق