بلودان من جنان سوريا
المصيف الذي جذب ولي عهد إيطاليا وامبراطور ألمانيا
بلودان من أقدم المصايف في سوريا والشرق الأوسط والو شهرة كبيرة في جذب السياح من القرن 19 بسبب مناخو الجميل بفصل الصيف.
الكتير من المشاهير زاروا بلودان عبر تاريخ هاد المصيف، أهمهن كان ولي عهد إيطاليا الأمير فيكتور عمانوئيل عام 1885، وفي عام 1898 زار بلودان امبراطور ألمانيا غليوم الثاني برفقة زوجتو، وزار بلودان كتير من الملوك والرؤساء والوزراء.
في بلودان انعقدت مؤتمرات منها المؤتمر والاجتماع اللي صار في فندق بلودان الكبير واللي تم تسميتو مؤتمر بلودان وجمع حكام دول عربية وناطقة بالعربية عام 1937 ساهمة بتأسيس جامعة الدول العربية.
أصل التسمية كمعظم قرى وبلدات ومدن سوريا آرامي سرياني وبتعني كلمة بلودان بلد اللوز.
بتضم بلودان أحراج وغابات وأشجار مثمرةـ وبتكتر فيها مياه الينابيع العذبة والباردة متل نبع أبو زاد وشلالاتو، ونبع عين النسور، ونبع عين البيضا، وينابيع حزير، وبفضل الشتا بتهطل الثلوج وبتتغطى بلودان بالأبيض وبتصل أحيانا سماكة التلج للمتر.
بتحتوي بلودان على مطاعم ومتنزهات ومدينة ألعاب وفنادق كتيرة، بالاضافة لوجود آثار تاريخية متل آثار وادي مار الياس ودير يونان الموجود على قمة جبل بلودان وكنيسة دير مار جرجس وكتير من المغاور الطبيعية والكهوف القديمة منها مغارة موسى اللي قدر الباحثين أنو عمرها 200 سنة واستغرق حفرها 100 سنة بالطرق البدائية متل الفأس والفانوس وكان الحفر بهدف الحصول على "مادة رمل المازار" وطول المغارة 300 متر ومساحتها 7 آلاف متر مربع.
ليست هناك تعليقات:
إرسال تعليق