قرية بخعة السريانية المسلمة
بخعة احدى قرى القلمون سكانها سريان أي سوريين ناطقين بالسريانية
السريان هي تسمية للسوريين اللي حافظوا على لغة أجدادهن، ومو تعبير عن طائفة دينية مسيحية متل ما بحاول البعض يروج ألو، وقرية بخعة (المسلمة) بالقلمون مثال حي، ودليل واضح انو لغة سوريا مو محصورة بدين أو طائفة معينة.
بخعة ضيعة سورية بمحافظة ريف دمشق بمنطقة يبرود. بخعة هي وحدة من 3 ضيع من ضيع القلمون يلي لحد هلأ سكانها بيحكو سرياني كلغة أولى، قرية بخعة بتعتبر منسية تماماً متل كتير مناطق بسوريا تم اهمالها من الحكومات السورية السابقة.
بيرجع تاريخ بخعة متل معلولا وجبعدين لما قبل التاريخ للإنسان القديم والدلائل على هالشي بتتلخص متل مو بجبعدين ومعلولا بالكهوف والمغر يلي منتشرة هنيك، أما تسميتها فمن اللغة السريانية وبتعني بخعة الصرخة.
بنص بخعة بيتواجد بير الحصن يلي بتوصلو المي من الجنوب من خلال قناة اثرية و من بير الطولي يلي بيتواجد بشمال القرية حالياً، بالإضافة لعدد من معاصر العنب الأثرية.
سكان الضيعة كانوا لوقت مو بالبعيد خليط بين مسلمين و مسيحية ولحد اليوم بتتواجد كنيسة القديس اندراوس هنيك لكن للاسف مهجورة من وقت هاجر سكان القرية المسيحين لمعلولا او لمناطق تانية بدمشق.
بخعة بيذكرها الدكتور Werner Arnold بكتاباتو عن الفترة يلي عاش فيها بسوريا بين سنة 1985-1988 وبيدكر أنو لهداك الوقت ما كان متوفر طريق للقرية وأنو كان مضطر ليخلص رسالة الدكتوراة تبعو باللغة الآرامية أنو يمشي مسافة 5 كيلو متر من معلولا لبخعة روحة رجعة ويمكن هاد الشي الأساسي يلي ساعد أهل المنطقة أنو يحافظو عاللغة ومنع الاختلاط بينهن وبين المناطق التانية لفترة طويلة.
حالياً اهل بخعة متل أهل معلولا غالب اوقات السنة بيتواجدوا بالشام بسبب اعمالهن وفقط بالصيف بيكون الغالب بالضيعة. يذكر انو القرية تعرضت لدمار كبير خلال فترة الحرب.
ليست هناك تعليقات:
إرسال تعليق