كنوز سوريا التي دمرتها الحرب
آثار سوريا المدمرة كما اولادها نالت ما نالوا دُمرت اُحرقت وسُرقت
بنسمع كتير عن اخبار الحرب السورية و عدد القتلى اليومي على نشرات الاخبار بس مو دائماً بنشوف تقارير عم تحكي عن تدمير الارث الحضاري السوري.
بعد مرور اكتر من عشر سنين على الحرب بسوريا ومرور الحرب بمراحل تطور وقتل لكل شي بسوريا البشر الحجر وسياسة بعض الدول لتدمير السوريين مو بس بالقتل انما بتدمير الإرث الحضاري لسوريا أرض الحضارات.
مدينة حلب يلي تعتبر اقدم مستوطنة بشرية بالعالم تعرضت لدمار كبير خلال الحرب وتعتبر اكثر مدينة مدمرة بعد الحرب العالمية الثانية آثار حلب يلي انسرقت خلال الحرب وللاسف القسم الكبير يلي تدمر قلعة الحصن يلي وصفها لورنس العرب بمذكراتو بانو هي افضل قلعة محفوظة واكثر قلعة مثيرة للاعجاب بالعالم و يلي عجز صلاح الدين الايوبي من انو يستولي عليها تعرضت للقصف وتدمرت الكنيسة يلي جواتا.
مئات المدن القديمة يلي بترجع للحقبة الرومانية بسوريا تعرضت للتدمير الكامل او العبث والاضرار يلي غير قابلة للاصلاح حسب التقارير الواردة من علماء الآثار من بينها قلعة تدمر يلي تمركز الجيش السوري فيها و عمل ثكنة عسكرية بوادي المقابر بتدمر وحفر خندق دفاعي جوات الاثار القديمة بقلب المدينة!!
عالمة الآثار اللبنانية جوان فرشخ وصفت وضع الآثار السورية بالكارثي لحجم الدمار يلي صار فيها للاسف.
قبل الحرب تم انشاء ٢٥ متحف بكل مناطق سوريا للاسف تم سرقة او تدمير معظم هي المتاحف و للاسف مو معروفة الجهة المسؤولة عن السرقة.
بعض المناطق يلي تعرضت لتدمير جزئي او كلي:
١-مدينة بصرى
٢-البراء دير سنبل عين لاروس
٣- دير صيدنايا
٤-الجامع الاموي بحلب والجامع العمري بدرعا
٥-متحف حماة ومتحف حمص
٦-قلعة سيزر المطلة على نهر العاصي
٧-مدينة ايبلا بمحافظة ادلب
٨-مدينة افاميا
٩-المدينة القديمة بحلب
١٠-مدينة تدمر الاثرية
والعد يطول للأسف منظمات دولية على راسا اليونيسكو طلبت باكتر من مناسبة تحييد المناطق الاثرية عن الصراع السوري وطلبت من الفرقاء المتصارعين ابعاد المناطق الاثرية عن الحرب لكن للأسف ما حدا سمع، الصحفي البريطاني روبيرت فيسك بيرثي سوريا وآثارها بنهاية مقالو عن الوضع بسوريا وبيقول " انو صحيح مقتل طفل سوري الو اهمية انسانية اكثر من نهب ومحو ٣٠٠٠ سنة من الحضارة السورية، بس تدمير وسرقة مدن كاملة من التاريخ البشري رح يحرم الأجيال الجاية من حقوقن انو يعرفو تاريخن وتاريخ اسلافن، وانو الصراع السوري رح يحرم البشرية جمعاء من اصل الحضارات و مهدا للأبد".
ليست هناك تعليقات:
إرسال تعليق