ارتباط عيد الميلاد بإله الشمس التدمري
جذور الاحتفال بعيد الميلاد بترجع للوثنية ولإله الشمس التدمري ملكبيل
متل مو معروف فتاريخ 25 كانون الأول هو يوم عيد الميلاد عند الطوائف المسيحية الغربية وهو نفس اليوم اللي كان يتم الاحتفال فيه بعيد إله الشمس "سول انفكتوس" عند الوثنيين في الامبراطورية الرومانية طبعا كل الاحترام لكل العقائد وللتذكير فجميع الكنائس بتقول أنو تاريخ 25 كانون الاول مو هو يوم الولادة الحقيقي للمسيح لهيك فعادي اذا كان هالتاريخ الو اصول قديمة متل ما قصة الخضر مرتبطة بمار جرجس على سبيل المثال.
روما كان فيها اله شمس اسمو سول وكان تقريبا عديم الاهمية وفجأة بعد رجعة اورليان من تدمر وهو الامبراطور الروماني اللي هزم تدمر، ظهر إله جديد للشمس الو اهمية كتير كبيرة عند الاباطرة، هاد الإله صار اسمو سول-انفيكتوس (الشمس القاهرة) يللي اورليان بنى ألو معبد عملاق سنة 274.
هالخطوة كانت غريبة، والكل تسائل من فين اورليان جاب هاد الإله؟ وليش الاهتمام المفاجئ بالشمس؟
في عدة نظريات، بس معظم المؤرخين موافقين أنو أصل هالإله من سوريا، والخلاف هو فيما اذا كان سول-انفيكتوس هو اله حمص (اكليل الجبل) او اله تدمر ملاكبل.
الاله التدمري هو الاحتمال الارجح، وهاد الشي منستدل عليه من كتابات المؤرخ البيزنطي زوسيموس يللي قال انو اورليان بعد رجعتو من تدمر بنى معبد للشمس ووضع فيه تماثيل الهة جابهن من تدمر هنن اله تدمر الاكبر بل وتمثال لإله الشمس هيليوس (طبعا زوسيموس عميستخدم اسم اله الشمس اليوناني بما انو الغربيين كانو يشوفو صفات الالهة السورية ويقارنوها بما يشبهها عندهن، فاللات صارو يسموها اثينا وامون المصري صارو يسموه زيوس).
اله الشمس عند التدمريين ملكبيل
اورليان افتتح المعبد ب 25 كانون الاول وصار سول انفيكتوس الإله المفضل للأباطرة، والاحتفال بعيدو كان ب 25 كانون الاول وكان اسم العيد "ميلاد الشمس الذي لا يقهر"، بس لما انحسرت الوثنية وسادت المسيحية، تم اختيار نفس هاليوم يوم عيد الميلاد، بس في كتير من رجال اللاهوت بيرفضو انو تم اختيار هاليوم بسبب سول انفيكتوس.
اله الشمس عند الرومان سول انفيكتوس
المصادر:
(2) Hijmans, Steven E. "The Sun Which Did Not Rise In the East." BABESCH 8 (1996), 115-150.
ليست هناك تعليقات:
إرسال تعليق