أول مديرية للرقية الشرعية في العالم

العالم يستثمر بالطب وسوريا تفتح مديرية تنظم النفث والزيت المقروء عليه

غالباً رح تكون أول مرة بتسمع بشي اسمو "مديرية الرقية الشرعية" إذا ما كنت متابع حسابات وزارة الأوقاف السورية عالسوشيال ميديا، وهاد شي طبيعي، لأنو هيك مديرية مو موجودة حتى بدول بتطبق الشريعة من سنين، متل السعودية وأفغانستان.

طيب شو يعني الرقية الشرعية بالأساس؟

هي استخدام آيات من القرآن وأدعية نبوية (من السنة) لطلب الشفاء من الله من السحر، الحسد، العين، المس، وحتى بعض الأمراض النفسية أو الجسدية اللي بيعتقدوا إنو سببها تأثيرات من الجن والشياطين.

بسوريا، مع إنو الموضوع مو شائع أبداً، ونادر تلاقي حدا بيلجأ إلو، حتى بين الناس المتدينين، قررت الحكومة تنشئ مديرية للرقية الشرعية. ومديرية يعني مكاتب، وموظفين، ومصاريف، وكل هاد ببلد أصلاً عم يعاني من قلة سيولة وصعوبة بدفع رواتب الموظفين الحكوميين.

والصورة من حساب وزارة الأوقاف السورية اللي نشر صور من اجتماع مديرية الرقية الشرعية لتطوير الأداء الدعوي والإداري...

 

شو ضرورة إنشاء مديرية للرقية الشرعية؟

الرقي شي بسيط قراءة سور وآيات متل الفاتحة، وآية الكرسي، والمعوذات، وكمان أدعية نبوية، وبالآخر النفخ بعد القراءة عالمريض أو على مي وزيت بيستخدموها للدهان أو الشرب. يعني الموضوع ما بيحتاج حتى شي اسمو "رقاة"، لأنو دينياً، وبحسب السنة، الرسول كان يرقي نفسه ويرقي غيره، وقال: "لا بأس بالرقى ما لم تكن شركاً" (رواه مسلم).

متل ما قلنا، سوريا هي الدولة الوحيدة بالعالم اللي عندها مديرية رسمية للرقية الشرعية، تابعة لوزارة الأوقاف. بينما بدول تانية متل السعودية في تنظيم للرقاة تحت إشراف وزارة الشؤون الإسلامية، وبيصدروا تراخيص أحياناً، بس من دون فتح مديريات ومكاتب.

يعني حتى بدولة بتطبق الشريعة الإسلامية متل السعودية، ما شافوا ضرورة يعملوا مديرية خاصة، رغم الأريحية المادية اللي عندهن. بس يبدو إنو الحكومة السورية شايفة إنو هالموضوع أولوية، وعم تشتغل عليه انسجاماً مع توجهها الديني، ويمكن لإرضاء أطراف معينة، حتى بوقت في مديريات خدمية كتيرة بالدولة ببعض المحافظات مسكرة متل النفوس.

بالوقت اللي الناس فيه عم تدور على دوا، خبز، ومازوت، الحكومة قررت تدور على حلول روحانية وتنشئ مديرية للرقية الشرعية. يمكن في ناس فعلاً مؤمنة بهالموضوع وبتشوف فيه فائدة، بس إنشاء مديرية كاملة بهيك ظروف بيخلينا نسأل: فعلاً أولويتنا هلأ تنظيم النفخ والمي المقروء عليه؟ ولا في مشاكل أهم كان لازم تندرس قبل ما نفتح مكاتب جديدة ونعين موظفين جدد؟

مصدر:

(1) حساب وزارة الأوقاف السورية على موقع إكس