مملكة بارجا وجبال الساحل
جبال بارجيلوس (الساحل) اسمها مشتق من اسم مدينة بارجا (بارغا)
مدينة بارجا حاليا غير موجودة ومو معروف موقعها بالضبط يس الارشيف الايبلاوي كشف أنها كانت بتتبع لإيبلا وموجودة بالجبال قبل أكتر من 4500 سنة وحسب الدراسات فالمدينة واقعة بالجبال بين مملكة قطنا ومملكة أيبلا جنوب غرب حلب قريبة حماة وسهل الغاب وكانت سبب للتنازع بين قطنا وإيبلا.
كانت المملكة أو المدينة حسب رسائل تل العمارنة بمصر من 1350-1335 قبل الميلاد وما بعدها. وذكرها مرسيليس التاني في المعاهدات بأنها "أرض برغا" بس مملكة انذكرت قبل هاد التاريخ بكتير ويتوقع أنو بدايتها كانت حوالي عام 2500 قبل الميلاد.
بتتألف مراسلات رسائل تل العمارنة من 382 حرف من الصلصال، معظمها مكتوب لفرعون مصر القديمة، وتم ذكر مدينة بارغا بالرسائل اللي كتبها أكيزي أمير قطنا.
بفترة احتلال الحثيين سوريا بارغا كانت مملكة مسيطرة على قسم كبير من جبال الساحل السوري وملكها اعلن خضوعه للحثيين يللي عرّفو كل المنطقة باسم هالمدينة السورية.
بفترة لاحقة من الزمن صارت بارغا وجبال الساحل تابعة لأرواد بس بعدين اختفت من التاريخ وبتحتاج لتنقيب حتى نقدر نكشف عنها بس للأسف بسبب عدم الاهتمام ما انعمل أي تنقيبات جدية بجبال الساحل لليوم ومعلوماتنا عن المملكة القديمة كتير قليلة.
كان اسم هي الجبال في البداية جبال البارغا بعدين سموها اليونانيين البارجيلوس بعدين الاسماعيليين سموها البحراء بعدين العثمانيين عطوها اسم طائفي أما اليوم فالاسم المستخدم أكتر هو اسم جبال الساحل.
مدينة أو مملكة بارجا القديمة ما ذكرتها المصادر باللغة العربية ولا انعمل حولها أي دراسة بسوريا لليوم للأسف.
ملاحظة: في مدينتين حاليا بيحملو نفس الاسم وحدة باليونان ووحدة بإيطاليا والمدينتين ما لهن علاقة بمدينة بارغا Barga السورية فالمدينتين تاريخ تأسيسهن بعد الميلاد.
ليست هناك تعليقات:
إرسال تعليق