البروكار الدمشقي قماش الملوك

قماش البروكار الدمشقي أشهر أنواع المنسوجات في العالم

يعتبر قماش البروكار الدمشقي أشهر وأفخر أنواع الأقمشة والمنسوجات والأغلى في العالم. وبينصنع القماش من خيوط الدهب والفضة والحرير الطبيعي. 

بتنفرد فيه مدينة دمشق من زمان وإلو حرفيين وصناعين متخصصين ومشهورين حتى تم اقتران البروكار عالمياً باسم دمشق (damask).

بداية البروكار كانت باالصين حوالي 300 قبل الميلاد واللي عرفتو دمشق بالبداية عن طريق قوافل الحرير اللي كانت تجي من الصين واللي اقترن بعدها باسمها بسبب ابداع الدمشقيين بتصنيعو.

صورة للباس من البروكار حولي 1770-1760

دخّل الصليبيين اللي مرّوا من دمشق البروكار لأوروبا بالقرن 11 وبالقرن 14 استخدمت كلمة داماسك (damask) للمرة الأولى باللغة الفرنسية.

عجبهن الملوك والأمراء الأوروبيين حتى أنو ملك أنكلترا ويليام التالت أسس صناعة البروكار الدمشقي في إيرلندا بأواخر القرن الـ 17.

البروكار الدمشقي كان مفضل عند العائلة الملكية البريطانية فلبست الملكة اليزابيث التانية فستان من البروكار مصنوع في دمشق، وموجود اليوم بمتحف "مدام توسو" بلندن، ومكتوب عليه عبارة "البروكار الدمشقي".

تراجعت صناعة البروكار اليوم في سوريا ودمشق تحديدا بسبب عوامل كتيرة منها انخفاض انتاج الحرير، وعدم تربية دودة القز، ونقص المواد الأولية وهجرة الحرفيين بسبب الحرب الأهلية. 

للبروكار الدمشقي تطريزات وروسومات كتير منها الكشمير والعاشق والمعشوق ورسوم لعمر الخيام، وصفات الحرير الطبيعي هي اللي بتعطي تموج بالألوان، ومن الرسمات النباتية منها الياسمين الدمشقي، وورق العنب، ومن الرسومات من برا رحلة السندباد البحري اللي لاقت رواج واسع بالإضافة للوحة أرض معركة حطين.

وجاب الحرفي الدمشقي رسومات من ثقافات وقصص الشعوب الأوروبية منها إيطاليا وانرسمت "روميو وجولييت"، ورسوم مأخوذة من إمبراطور بألمانيا "تاج ملوكي" ورسمة "الفراشة"، وهون بيبرز مدى تلاقي الحضارات وانسجامها على القماش الدمشقي متل ما هي أرض سوريا اللي شهدت على الدوام أبرز الحضارات بتنوع فنونها.

على أمل تبقى صناعة البروكار الدمشقي خالدة في سوريا ومع السوريين. 

المصادر:

(1) (2) (3) (4)