سلاف فواخرجي سيدة التناقضات
اطلالة سلاف فواخرجي على تلفزيون DW تظهر كمية الشيزوفرينيا في شخصيتها
بلقاء متلفز على قناة DW الألمانية بتحكي الممثلة السورية سلاف فواخرجي بثقة كبيرة عن الحريات وحرية الرأي وعن كمية تأييدها للمساواة بين الجنسين ودعم الحريات وتعديل الدستور لفصل الدين عّن الدولة، بس باول اختبار لالها بيبن انو هي حافظة منيح باحد أقبية الافرع الامنية المقدم اللبناني جعفر بيسأل عّن اثارة الجدل بسبب قبلتها بمسلسل شارع شيكاغو بتقلو هي التعليقات المسيئة اجت اغلبها من سوريين باوروبا ( رسالة عّن اللاجئين السوريين باوروبا)، و بتسردلنا متابعة بحكيها انو سوريا قبل ال 2011 كانت بوضع نوعاً ما مثالي!!
طبعاً بتحكي عن التخلف المجتمعي بسوريا والتاريخ عندا طبعاً بيبلش بال 2011 لكن بتتناسى المسؤول الاول عن هاد التخلف يلي هو النظام الحاكم من 60 سنة يلي اشتغل على هجرة العقول من البلد على تهميش طبقات المجتمع واشتغل على تجييش الشعب لعبادة الشخص، وبتبرر هالحكي بانو نحنا عايشين ببلد "عربي" الفساد جزء منو!!
المشكلة الاكبر انو هي عّم تلوم الشعب السوري يلي هي على اساس بتمثلو بكل الخراب السوري وتناست مين السبب الرئيسي بهاد الوضع الحالي يلي وصلتلو سوريا، المشكلة الاكبر انو الممثلة السورية يلي تعتبر من الطبقة المثقفة للاسف بسوريا عّم تقارن سقوط قذيفة على مدينة او قرية بقصف النظام على المدن السورية المختلفة بمختلف انواع الاسلحة عّم تساوي بين الجلاد والضحية.
وصفت كل معارضين الاسد بالشخص الداعشي!!
المشكلة الاكبر انو عّم تقارن بين الوضع بسوريا وبين دول تانية السوريين عّم يهاجروا عليها ليشتغلوا.
ادعت بمقابلتها بعدم وجود قمع للثورة بالبداية!
وتعليقاً على سؤالها عن صور قيصر بتقول بكل حرب في ضحايا!!
وقالت انو كان في ناس محقة جداً تم استغلالها من قبل جهات خارجية لا ست سلاف هي الناس المحقة جداً هي نفسها بالصور يلي انت قلتي انو بكل حرب في ضحايا وفي منا عالم لسا موجودة بس بالمعتقلات تبع الشخص يلي عّم تدافعي عنو اسف ست سلاف ازا بدّي قلك انو الشخص يلي عّم تدافعي عنو هو يلي طالع المسلحين يلي انت عّم تنعتي الشعب السوري فيهن من السجون وسلحن اذا بدك والامثلة عليهن كتيرة، اسف اني قلك انو زهرة شباب سوريا ماتت بمعتقلات صمام الامان (متل ما سميتي) يلي عّم تدافعي عنو، ويلي حسن يطلع من المعتقلات هاجر وترك البلد او خلو غصب عنو يترك البلد.
عرفتي الاشخاص المحقة وينا ولا بدك نقلك كمان.
ست سلاف سيرة التخويف من الاسلاميين قصة قديمة اكل الدهر عليها وشرب, كمية القرف من هيك تبرير كبيرة ياريت بالمرات القادمة تعلني موقفك بشكل مباشر من دون ترقيع لانو السوريين مو اغبياء ولانو السوريين عّم يهاجروا عالصومال مو ليبيا مشان يعيشو لانو المعيشة هنيك احسن من المعيشة بسوريا.
للاسف الموقف من الاحداث بسوريا فاض عن كونو موقف سياسي وصار موقف انساني هي الشعارات الرنانة يلي بلشتي فيها مقابلتك ياريتك كملتي فيها.
ليست هناك تعليقات:
إرسال تعليق