صابون حلب الصابون الأقدم في العالم
الصابون الذي استخدمته زنوبيا لم تتغير طرق صناعته في حلب لليوم
صابون حلبي أو صابون الغار أو متل مو معروف بلهجة حلب صابون الركّي هو نوع من أنواع الصابون اللي كان أهل حلب أول ناس صنعتو وأبدعوا بصناعتو، واللي بيتم صناعتو من مواد طبيعية تماماً، وما بيدخل بصناعتو أي مواد كيميائية متل أغلب أنواع الصابون التانية.
بترجع صناعة صابون الغار في حلب لقبل 2000 عام قبل الميلاد، وما تغيرت طريقة صناعتو التقليدية كتير من هداك الوقت، ولهلق محافظ على طريقة الانتاج التقليدي الشبه يدوية مع شوية تطور بمرور الزمن.
بنحط الصابون على شكل هرم (اسم هي الطريقة البيبار) ضمن فراغات معينة لضمان تهوية جيدة للصابون، ولمدة من الوقت بين 6 لـ 9 أشهر، وبعدها بيصير جاهز للتسويق.
الصابون الحلبي كان ينقال أنو استخدمتو ملكة سوريا زنوبيا، وحتى قيل كمان أنو ملكة مصر كليوبترا كانت تستخدمو، بس الأكيد حول صابون الغار الحلبي أنو انطلق من المشرق من سوريا الطبيعية وتحديداً من حلب، وانتقل للغرب لأوروبا منها بعد الحروب الصليبية الأولى والدليل على هاد الشي هو إنو أقدم صابون غار انصنع بأوروبا كان بعد الحروب الصليبية بوقت قصير، بس الصابون كان معروف للرومان بالقرن الأول الميلادي، ووصف زوسيموس من بانوبوليس الصابون وصناعة الصابون عام 300 ميلادي.
قبل الحرب الأهلية بسوريا كان الصابون الحلبي بأغلب انتاجو بيتم تصديرو لأوروبا وشرق آسيا وخاصة النوع اللي بيحوي على أكتر من 16 بالمية من زيت الغار، وبرعت بصناعة صابون الغار عيل حلبية عريقة متل (فنصة، زنابيلي، الحلاق، قداح.. وغيرها) وارتبطت أسماء هي العيل بأنواع الصابون بالأسواق.
الحرب اللي وصلت أحياء حلب القديمة وأسواقها عام 2012 سبب ضربة كبيرة لانتاج وتصنيع الصابون الحلبي، وتسببت هي الحرب بالإضافة لأضرارها المادية بهجرة كتير من الصناعيين المختصين بصناعة الصابون الحلبي، وهاد خلى صناعتو تنتشر اكتر حول العالم، بس اليوم وبعد نهاية الحرب في حلب بلشت شوي شوي تتعافى صناعتو، وتم اعادة افتتاح خان الصابون بحلب اللي عمرو اكتر من 520 سنة وهو أشهر خانات حلب وتمت إعادة ترميمو بنفس الأحجار القديمة وكان باشراف مديرية الآثار والمتاحف وبيحوي الخان على أكبر قطعة صابون غار بالعالم وزنها 1520 كغ.
ليست هناك تعليقات:
إرسال تعليق