النجمة الخضراء أم الحمراء أيتهما تمثل سوريا؟
الأحمر ليس علم النظام و الأخضر ليس علم الانتداب أو المعارضة
العلم الوطني لأي بلد هو الشي اللي بمثل هي البلد بتاريخها وحاضرها بس بسوريا الوضع مختلف وخصوصا بعد الحرب الأهلية اللي تنين من أطرافها تبنو علمين سوريين مختلفين.
بتاريخ الجمهورية السورية تغير العلم الوطني لسوريا اكتر من مرة بس بضل أبرز علمين في تاريخ سوريا المعاصر هنن العلم بالشريط الأخضر و3 نجوم حمر والعلم بالشريط الأحمر وبنجمتين خضر.
الأول هو علم الاستقلال علم الجمهورية السورية الأول اللي استمر استخدامو 28 سنة بين عامي 1932 - 1958 وبين عامي 1961 - 1963 الفترة الأولى هي فترة اعلان الجمهورية السورية واستمر بعد الاستقلال عن فرنسا عن تاريخ 1958 تاريخ الوحدة مع مصر، والفترة التانية هي فترة الانفصال عن مصر عن انقلاب البعث عام 1963.
التاني هو علم سوريا الحالي والمعتمد رسمياً ودولياً وكمان امتد لفترتين الأولى فترة الوحدة مع مصر بين عامي 1958 - 1961 والفترة التانية مستمرة من عام 1980.
العلمين تم اعتماد ألوانهن بتأثير موجة القومية العربية فالألوان مستمدة من ألوان علم الثورة العربية الكبرى وهو أول علم انرفع في دمشق بعد انزال العلم العثماني بالاضافة لاعتماد علم مشابه بعد اعلان المملكة العربية السورية في 8 آذار 1920.
علم الاستقلال بنجومو كان بمثل بالبداية أقاليم سوريا دمشق وحلب ودير الزور، وبعد انضمام جبل الدروز و جبل العلوين لسوريا صارت النجوم بتمثل السنة - الدروز - العلويين.
العلم (الأخضر) ما ممكن نسميه علم الانتداب حتى لو كان بعهد الانتداب فاعتمادو لسببين رئيسيين الأول أنو العلم ما كان بموافقة فرنسا في البداية وكان من تصميم السوريين وأقرتو اللجنة الجمعية التأسيسية لدستور سوريا الجديد برئاسة ابراهيم هنانو، وارتفع أول مرة بسوريا في حلب عام 1 كانون الثاني عام 1932 وارتفع بدمشق نفس العام ب 12 حزيران، أما السبب التاني فالعلم اعتمد مرة تانية بعد الاستقلال عن فرنسا واعتبر علم الاستقلال حتى أنو الاحتفالات بيوم الجلاء حتى عام 2011 كانت تستخدم العلم كونو برمز وبذكر باستقلال سوريا عن فرنسا وبذكر بنضال السوريين بهداك الوقت.
علم سوريا الحالي هو بالأساس علم الوحدة بين مصر وسوريا والنجمتين كل نجمة بترمز لبلد، وتم اعتمادو أول مرة بعد اعلان قيام الجمهورية العربية المتحدة عام 1958 وبعهد حافظ الأسد عام 1980 تم اعتماد العلم مرة تانية للتذكير بضرورة ما يسمى الوحدة العربية، ومازال العلم معتمد رسمياً لليوم.
بغض النظر على أنو ألوان العلمين ما بتمثل سوريا وتاريخها الممتد لآلاف السنين وعدم وجود أي رمز أو دلالة سورية في العلمين وبغض النظر عن التجاذب السياسي الحالي واعتماد االمعارضة علم الاستقلال وتمسك النظام بعلم الوحدة العربية، فالعلمين مثّلو سوريا وحملهن أبطال سوريين في المحافل الدولية، فأول ميدالية دهبية أولومبية سورية كان بفضل البطلة غادة شعاع اللي كانت حاملة علم السوريين بوقتها وغيرها من الرياضيين والمنتخبات السورية اللي مثلو سوريا بهاد العلم، بالإضافة أنو شهداء الجيش السوري بحرب تشرين كانو حاملين هاد العلم، حتى بداية التحركات في سوريا بدرعا كان ينرفع هاد العلم وكتير من شهداء ورموز الثورة السورية استخدمو العلم متل ابراهيم القاشوش وحسين هرموش.
مظاهرة للمعارضة في حماة عام 2011
علم الاستقلال مثل السوريين لأول مرة بمجلس الأمن والأمم المتحدة وحملو أبطال الثورة السورية الكبرى ضد الاتنداب الفرنسي ومثل حقبة دهبية في تاريخ سوريا المعاصر.
احتفالات بدير الزور بيوم الجلاء
ما ممكن لسوري حقيقي يهين أي علم من العلمين بحرق أو دعس بسبب استخدام بعض الخونة والمتطرفين لواحد منهن وما ممكن تخوين شخص لمجرد تبنيه واحد من العلمين السوريين.
منتمنى يوم من الأيام يتم وضع واعتماد علم سوري حقيقي بمثل سوريا أكتر ويوحد السوريين تحتو باختلاف أفكارهن وانتمائاتهن، ومن هون لهداك الوقت علينا احترام أعلام سوريا باختلاف اعتماداتها السياسية الحالية، وبعيد عن التجاذبات اللي عبتصير هي الأيام.
ليست هناك تعليقات:
إرسال تعليق