الكباب من حلب للعالم
أصل كلمة كباب آرامي سوري من كلمة كبابو التي تعني التفحيم
أهل حلب هنن أول ناس عملو الكباب وهنن اللي سموه ونشرو طريقة إعدادو بكل أرجاء سوريا الطبيعية واللي انتقل منها للعراق ولتركيا ولليونان وقبرص ووسط آسيا.
بتميز الكباب السوري عامة والحلبي بشكل خاص بطعمه الفريد بسبب نوعية اللحم الفاخر من العواس السوري المتميز بطعمتو الخاصة وبسبب طيب المرعى وخصوصاً أنو مدينة الباب التابعة لحلب ومحافظة حماة القريبة مشهورين بخصوبة المراعي، وهاد بخلي الأغنام المستخدمة بتحضير الأكل الحلبي وخاصة الكباب مميزة من لحم فاخر.
الكباب الحلبي بيعملوه أهل حلب بطرق كتيرة واللي بدون إضافات هو أصل الكباب ومعروف عالمياً بالكباب الحلبي، وفي الكباب اللي بنضاف الو فستق حلبي أو صنوبر أو الكباب اللي بنشوى مع البادنجان (كباب بانجان) أو الكباب اللي بينشوى مع فطر الكماية أو مع البصل، وأشهر أنواع الكباب الحلبي هو الكباب الخشخاش اللي بينعمل مع البندورة والفليفلة والبقدونس والبصل والنعناع وبينفرك كلو سوا.
برجع اسم الكباب للكلمة الآرامية كبابو واللي بتعني بالعربي التفحيم، وبالقرن 14 استعملت الكلمة للدلالة على طريقة شوي اللحم المفروم على شكل كروي، أما وقت يتم اضافة كلمة شيش كباب فهو للدلالة على شوي اللحم على الأسياخ وكلمة شيش كلمة تركية بتعني السيخ Şiş.
في العالم الغربي كلمة كباب لوحدها بتدل على الشوي على السيخ متل Veggie Kabob وهي الخضروات المشوية أو Corn Chicken Kabob وهي أسياخ الدجاج المغطى بطحين الدرة المحلى بالسكر، أما في تركيا فكلمة كباب ما تغيرت وبتتسمى Kebep نفس الاستخدام السوري اليوم.
بحاول الأتراك بشكل دائم الترويج على أنو الكباب أكلة شعبية تركية ويذكر أنو الكباب التركي مشهور بمدينتين بتركيا هنن أضنة وأورفا (الرها) اللي كانو تابعين لولاية حلب بفترة الاحتلال العقماني، وهاد من أسباب تميز المدنتين بالكباب متل كتير من الأكلات فيهن.
ليست هناك تعليقات:
إرسال تعليق