الحركة الكشفية في سوريا - كشاف سوريا
كشاف سوريا من التأسيس للحظر لاعادة النشاط
الكشافة هي حركة شبابية تطوعية غير سياسية عالمية، أسسها ووضع فواعدها اللورد بادن باول عام 1907.
وصلت لسوريا ولبنان بكير كتير عام 1912 لتكون سوريا من أوائل الدول بالعالم اللي بلش فيها النشاط الكشفي وحتى قبل دول أوروبية كتير.
تأسست المنظمة العالمية للحركة الكشفية عام 1920 وبعام 1922 انتشرت في المدارس الابتدائية والاعدادية وبعام 1924 انضمت سوريا للمنظمة رسمياً وانتشرت بشكل كبير كتير بكل أرجاء سوريا وخاصة بين الطلبة والعمال عام 1934 بس بعام 1935 أوقفها المندوب الفرنسي ورغم هيك ضلت الحركة الكشفية مستمرة وكانت تساهم بإيصال الأغذية والمعونة لمناطق الثوار اللي حاصرها الفرنسيين وهاد تسبب باعتقال عدد من الكشافة والحكم بالاعدام عليهن، بس بعدين فرنسا تراجعت عن قرارها بسبب الضغوطات الدولية الكبيرة.
بعد الاستقلال أعيد تسجيل سوريا رسمياً بالمنظمة العالمية للحركة الكشفية عام 1949 بس قبل هاد التاريخ وبعام 1947 صدر مرسوم جمهوري رقم 46 (النظام الأساسي لكشاف سوريا) ولهلأ مستمر العمل فيو وتبعو قرار جمهوري رقم 197 للاهتمام بالحركة الكشفية السورية ودعمها.
في 20 شباط عام 1958 كرم رئيس الجمهورية السورية شكري القوتلي انذاك الحركة الكشفية السورية ومنح علم كشاف سوريا وسام الاستحقاق السوري من الدرجة الممتازة باستحقاق وعن جدارة لدور الحركة الكشفية وتأثيرها في حياة المجتمع.
بعد وصول البعث للسطلة بلش التضييق على الحركة الكشفية وبعام 1982 تم حظر الحركة بشكل نهائي بحجة تأسيس منظمة طلائع البعث واتحاد شبيبة الثورة واللي حاول فيها البعث ينتج نسخة بعثية من الكشاف فقانون الكشاف صار قانون الطليعي وعهد الكشاف صار عهد الطليعي والفولار الكشفي صار لبس رسمي للمدارس بس عليه شعار طلائع البعث والمخيمات للشباب صارت حكر كمان لطلائع البعث وشبيبة الثورة.
خلال هي الفترة كانت الحركة الكشفية موجودة ببعض الكنائس بس افتقدت للنشاط والزخم اللي كان واقتصرت على رحلات لمناطق طبيعية ووجود فرق موسيقية بدون ما يكون في أي تخييم أو نشاط كشفي حقيقي حتى عام 2006 وقت صدر قرار من الرئيس بشار الأسد بالسماح للحركة الكشفية بمتابعة نشاطها بعد 24 سنة من الحظر، ورغم هيك كانت كل قيادات الكشافة بالمحافظات هنن من المخابرات لمتابعة الكشافة عن قرب وبعد ما بلشت أحداث 2011 تسببت التقارير باعتقال عشرات الكشافة المعارضين للنظام رغم عدم مشاركتهن بأي نشاط سياسي واستشهد كتير منهن بأعمال القصف المتبادل بين النظام والمعارضة ويقدر عدد كشاف سوريا بعد اعادة النشاط بعشرات الآلاف، أكبر الأفواج الكشفية في سوريا الفوج التاني في حلب (النجدة) والفوج الخامس البحري في اللاذقية والفوج الأول في ريف دمشق والفوج التالت في حمص.
يذكر أنو رئيس الكشاف المعين من الحكومة هو الياس شحود صار عضو بمجلس الشعب عن مدينة دمشق بالانتخابات الأخيرة.
ليست هناك تعليقات:
إرسال تعليق