القديس بطرس من الجولان أول بابا للفاتيكان
القديس بطرس كان بابا للفاتيكان ل 37 عاماً وواحد من خمسة سوريين حكموا الفاتيكان
بطرس أو سمعان بطرس بالسريانية ܫܡܥܘܢ ܟܐܦܐ ابن يوحنا أبو يونا من قرية بيت صيدا في الجولان السوري وواحد من تلامذة المسيح.
اسم سمعان هو اسم آرامي بيعني الصخرة وسبب تسميتو بالصخرة حسب الروايات أنو صار حوار بين يسوع وتلاميذو اللي سألهن: "شو بقول الناس عني؟" فصار يعطيه تلاميذو اجابات مختلفة نقلا عن كلام الناس أنو نبي أو يوحنا أو اليا النبي أو رجل صالح، فسألهن يسوع:"طيب أنتو شو بتقولو عني؟"، فجاوب سمعان بطرس: "أنت المسيح ابن الله الحي"، فسماه المسيح بالصخرة وقلو:" أنت الصخرة اللي رح ابني عليها كنيستي، وأبواب الجحيم ما رح تقوى عليها" وكان هاد الاعتراف الأول بعد يوحنا المعمدان.
سمعان بطرس هو أول واحد من التلاميذ اللي دعو وشغلو منصب المتحدث باسم الجماعة الأولى.
نال بطرس تبجيل في كنايس كتيرة ويعتبر أول باباوات الكنيسة الكاتوليكية، بعد ما اشتغل لتأسيس كنيسة أنطاكية مدة سبعة سنين.
بعترف أغلب المسيحيين بقداسة سمعان بطرس وبأنو هو أول باباوات روما بما فيهن الكاتوليك الشرقيين، وفي طوائف مسيحية تانية بتعتبر أنو هو أو أساقفة أنطاكية ومن بعدها صار أسقف روما.
بشر بطرس في فلسطين وفينيقيا والمناطق المحيطة فيها 5 سنين، وبعام 44 انتقل للقدس، وهنيك ملك اليهود هيرودس أمر بسجنو، بس الرواية بتفول أنو ملاك الرب خلصو من السجن واستمر بالتبشير.
القديس بطرس هو من بين اللي أسسو كنيسة روما واشتغل فيها 25 سنة قبل ما ينقتل خلال اضطهاد المسيحيين اللي صار أيام الإمبراطور نيرون عام 67 اللي أمر باعتقالو وسجنو وبعدها أمر بصلبو، ولشدة ايمانو ما رضي بطرس ألا ينصلب مقلوب عكس طريقة صلب المسيح حتى ما يتم يشبيهو للمسيح.
ليست هناك تعليقات:
إرسال تعليق