يامبليخوس فيلسوف البلاط الملكي
أعظم فلاسفة سوريا وأحد الدعاة لعدم أكل الحيوانات وحمايتها
يامبليخوس هو الاسم اليوناني لاسمو الآرامي السوري القديم "يا ملكو" وفي بعض المصادر اسمو يامبليخوس الخلقيسي أو القنسريني نسبة لمدينتو مسقط رأسو قنسرين اللي كان اسمها خلقيس الواقعة على نهر العاصي بمحافظة ادلب، وكان من عيلة ملكية غنية ومن المرجح أنو كان متصل بالعيلة الملكية الحمصية شمسيغرام اللي بتنتسب الها الامبراطورة السورية جوليا دومنا.
يامبليخوس رفض يحمل الاسم اليوناني وحافظ على اسمو الآرامي.
تتلمذ يامبليخوس على إيد أنطوليوس اللاذقي وبعدين انتقل ليكمل تعليمو على ايد فرفوريوس الصوري اللي كان تلميذ لأفلاطون والمؤسس للأفلاطونية الحديثة بس صار خلاف فكري بين يامبليخوس وفرفوريوس الصوري حول ممارسة الثيورجيا (السيمياء أو السحر أو الشعوذة، و هي مجموعة من الطقوس كانت بتستخدم لاستحضار الفعل الإلهي)، وقتها جمع يامبليخوس آرائو وانتقاداتو في دراسة حملت عنوان (الأسرار المصرية) للرد على فرفوريوس الصوري.
في العام 304 رجع لسوريا مشان يأسس مدرستو الخاصة في مدينة أفاميا واللي انعرفت بازدهار الفلسفة الأفلاطونية المحدثة فيها، وبهاد الوقت أسس منهج لدراسة أفلاطون وأرسطو، وأدلى بتعليقاتو حول الفيلسوفين و اللي ما نجى منها إلا مقتطفات قليلة.
كتب مجموعة العقائد الفيثاغورثية، وهي عشرة كتب بتضم مجموعة من الاقتباسات لفلاسفة قديمين، ما نجى منها ألا الأجزاء الأربعة الأولى و قسم من الجزء الخامس.
يامبليخوس كان رجل عظيم الثقافة والتعليم، وانعرف عنو الميل لعمل الخير والإيثار ونكران الذات. وروى عنو إيونابيوس بأنو العديد من الطلاب المتخرجين كانو يجتمعو حولو للإصغاء من كتر ما عندو أحاديث مهمة وجذابة ومنهم إيديسيوس وثيودوروس، فأحاديثو كانت جذابة لدرجة كانت بتخلي الطلاب يلتصقو فيو لساعات طويلة وهاد الشي كان يحرمو غالباً من أنو يرتاح.
وانذكر في سيرة حياتو انو كان ضد تعذيب الحيوانات وعدم قتلها لغاية أكلها ودعا لرعاية الحيوانات ومعالجتها وعاش مثالاً على مبادئه فكان نباتياً وعلم الناس انو من الخطأ الاعتداء على حياتها وتخريب مواطنها وبيئتها الطبيعية وكان ضد مبدأ التضحية بالحيوانات من أجل الآلهة ورفض المشروبات الكحولية.
يامبليخوس راح لأكتر من هيك وقت طلب من السياسيين انو يكونو نباتيين ليكونو قدوة لباقي الناس في العدل وعدم التسبب بالأذى.
كان يامبيلخوس الممثل الأهم للأفلطونية المحدثة في سوريا، بس تأثيرو ما اقتصر على سوريا، وتجاوزها ليشمل الكتير من أرجاء العالم القديم.
تعرض معظم الإنتاج الفكري ليامبليخوس للتخريب وما نجى منو إلا القليل، ومن أعمالو كانت تأسبس يامبليخوس منهج جديد للأفلاطونية المحدثة، وقتها ساد هاد المنهج واستمر الفلاسفة في اتباعو لقرنين لاحقين.
اقترح يامبليخوس بأنو تتدرس المحاورات الأفلاطونية بترتيب واضح، وحدد قواعد مُعرَّفة لتفاسيرها المجازية.
كان يامبليخوس بنظر إلى المحاورات الأفلاطونية بصفتها إلهاماً إلهياً، وكان من المفترض بأنو يؤثر كل واحد من هذه المحاورات في تحوّلٍ معين في روح طالب الحكمة.
كمان بكتابات نيكوستراتوس الترابزوني يللي سجل انجازات اباطرة روما منشوف انو كانت الافكار متركزة حول كيف الاباطرة فشلو محل ما نجح أذينة وبالتالي كان كتابو مقارنة بين ضعف الاباطرة الرومان و قوة الملك السوري.
كمان بكتابات نيكوستراتوس الترابزوني يللي سجل انجازات اباطرة روما منشوف انو كانت الافكار متركزة حول كيف الاباطرة فشلو محل ما نجح أذينة وبالتالي كان كتابو مقارنة بين ضعف الاباطرة الرومان و قوة الملك السوري.
توفي عام 330 مبلادي ومتلو متل كتير من العلماء والعباقرة السوريين تم نسبها بقصد وبغير قصد لشعوب تانية فببعض المصادر بتم اعتبارو يوناني وببعض المصادر بتم اعتبارو عربي! يا ملكو أو يامبليخوس فيلسوف سوري آرامي وما ممكن لحدا يغير ويزور هاد الشي.
ليست هناك تعليقات:
إرسال تعليق